Лакрал райондалул бакIчи Зураб Куччаев цала хъиривчу Малик ХIусмановлущал ва администрациялул зузалтращал дучрай ивунни гужсса буран сававну чани бакъа лирчIсса НицIавкIуллал, ДучIиннал ва Маркьиял шяраваллавун. Шикку вайннан лявкъунни, энергетиктал бучIаннин къабавцIуну, шяраваллил чиваркI тталлу бишин къувирду дуклай байбивхьуну.
КIанттул жямат дакIнийхтуну барчаллагьрай ливчIунни райондалул бакIчинайн ва ванащал бувкIминнайн. Муния махъ администрациялул делегация хьунабавкьунни кIанттул агьалинащал, ххал дурунни къатрал хIалкьазия. Хаснура итталун дагьунни НицIавкIуллал шяравалу, ацIния мукьва къатта бухьурчагу, уттинин шяраваллил статус дакъасса. Зураб Куччаевлул кIицI лавгунни шяраваллин статус булунсса сипта ххал дигьин.
Хъиривмур кьини чани бакъа лирчIсса шяраваллавун бувкIунни Лакрал райондалул электросетирдал ва Ккуллал сетирдал участокрал зузалт. Шяраваллал жяматрал кумаграцIух ряхва цIусса тталагу бивхьуну, цIусса ттукIрал ххаллугу дурцуну, буллунни чани.
Гъумучиял электросетирдал каялувчи Зураб ХIажиевлул барчаллагь увкунни кумагран бувкIсса шяраваллал агьалинахь, хаснува кIицI лавгунни Хьурттал шяраваллил бакIчи Сурхай Бариев ва КIулушацIрал шяраваллил бакIчи МухIсин МахIаммадов.
«Гьан-бучIан захIматсса зунттал шартIирдах къабурувгун, электросетирдал зузалтрал хьхьичI бивхьусса мурад биттур бунни – агьалинан цила чIумал чани буллунни. Машиналул ххуллу бакъасса кIанттурдайн тталлу карунних бувххуну, карунних бишингу багьунни. Амма кIанттул агьалинал кумаграцIух давуртту цила чIумал къуртал дан бювхъунни. Утти архсса щархъавусса агьалинан ттукIрал дузалшинна щаллу хьуссар», – увкунни ванал.
Лажин хIадур дурссар
Зулайхат Тахакьаевал
