Ларгсса нюжмардий Дагъусттан Республикалул ХIукуматрал ирглийсса батIаву хьунни. Шикку хьунни жулла республикалий «Пушкинская карта» тIисса цIанилусса федеральный проект иширайну щаллу даврин хас бувсса ихтилатру.

Дагъусттан Республикалул ХIукуматрал председатель Аьбдулмуслим Аьбдулмуслимовлул дакIнин бувтунни, билаятрал президент Владимир Путиннул хIукмулийн бувну, 2021-ку шиная шийннай жулва билаятрай зий душиву «Пушкинская карта» тIисса цIанилусса программа, ванийн бувну жагьилтураща уква музейрдавун, театрдавун, кинотеатрдавун ва цаймигу культуралул идарарттайн занан бюхъайшиву.

– «Пушкинская карта» жулва жагьилтурал культуралул даража лахъ бувансса ххаллилсса кашир. Культуралул мероприятиярттайнсса билетирттахсса хIакь вай дуллалисса культуралул идарарттан ­дуллалиссар федерал бюджетрава. Мукун, «Пушкинская карталийн» федерал бюджетрава наниссар 5 азарда къуруш. Ва къачIирисса лагрур. ОьрчIру спектакллайн ва выставкардайн гьаншиврул вайксса арцу харж дуван хIадурсса ва бюхълахъисса къачIявусса кулпатру буссар, хаснува кулпатраву кIива-шанма оьрчI бусса чIумал, – увкунни Аьбдулмуслим Аьбдулмуслимовлул.

Ванал муниципал сакиншиннардил каялувчитурайн тапшур бунни ва программалувух шайссаксса чIявусса жагьилтал гьуртту хъанахъаву мурадрайсса давурттал ялув бацIан. Ванал бувсмунийн бувну, чIявуссаннан ттигу къакIулну, къабавну бусса бур «Пушкинская карта» программа щалвагу Дагъусттаннай зий душиврия.
Ва программа жулла региондалий цукун зий дуссарив бувсунни республикалул культуралул министр Зарема Буттаевал.

Ялу-ялун машгьур хъанай, проект зузи дурния махъ жулла республикалий тIивтIуну бур «Пушкинская карталул» 212 932 единица (427 697 инсан).
ЧIяву хъанай бур ва карта ишла дурну жагьилтураща (оьрмулул 14 шинава 22 шинавун бияннинсса) бучIан ­шайсса, ­театрдаву, музейрдаву, библиотекарттаву ва цаймигу культуралул идарарттай ­хъанахъисса ишру, шадлугъру. Ва шинал ахирданийннин дуван дакIнийсса мукунсса 600-нния лирчусса культуралул мероприятияртту дур: спектакльлу, личIи-личIисса постановкартту ва мастер-классру, выставкарду, шаэртуращалсса ва чичултращалсса хьунабакьавуртту, киносеансру ва м.ц. Программа цурда зун диркIния махъ дурну дур 4800-нния лирчусса культуралул мероприятияртту.
Цилва ихтилатраву Зарема Буттаевал кIицI ­ларгу­нни ва ххуллий муниципалитетирттал культуралул идарарттай дуллалими давурттугу.

Бадрижамал Аьлиева