Февральданул 10-нний МахIачкъалалив «Фабрика процессов» тIисса КIулшиву дулаврил ва производствалул центрданий хьунни ДР-лул экономикалул министр ХIажи Султановлул пресс-конференция. Министрнал балжину бувсунни идаралул ларгсса шинал хьун дурсса ккаккиярттая, республикалул экономика хьхьичIуннай даву мурадрай кьамул дурсса хьхьичIунсса проектирдая ва гьашинусса шинал хьхьичIун лавсъсса агьамсса масъаларттая.
Мероприятие дайдишин хьхьичI, пагьму бусса насихIатчитурал каялувшиврий хьунни даврил даража гьаз баву мурадрайсса журналистътуращалсса производствалул практика. ХIакьину ва центрданий лахьхьин буллай бур производствалул кьяйдарду дуруччлан ва ми мюнпат буну ишла дуллан. 2022 шинал «Производительность труда» тIисса миллатрал проектрал лагрулий Экономикалул министерствалул Дагъусттаннал паччахIлугърал технический университетраву тIивтIуну бур «Фабрика производственных процессов» тIисса кIулшиву дулаврил центр. Шанна шинал лажиндарай ва центрданий даврил даража гьаз байсса кьяйдарду лархьхьуну дур региондалул предприятиярттай ва властьрал органнай зузисса 250 пишакарнал. Масалдаран, шикку МахIачкъалаллал Хьхьирил портрал кIулшивуртту ларсъсса пишакартурал захIматрал даража чIаланну гьаз хьуну бур. МахIачкъалаллал аэропортрайгу пассажиртурал регистрация даву ва ми кьамул баву анавар дуккан дурну дур. Дагъусттаннай «Производительность труда» проектрай гьуртту хьуну бур промышленностьрал, шяраваллил хозяйствалул, транспортрал ва строительствалул бутIуву зузисса 13 предприятие.
2026 шинал проектрай гьуртту хьунтIий бур цIуллушиву дуруччаврил, кIулшиву дулаврил, культуралул, захIматрал ва спортрал идарартту. Шикку кIулшивуртту ларсъсса пишакартурахь региондалул отраслирдай ми мюнпат буну ишла дуллансса практика ххишала хъанахъиссар.
Экономикалул министерствалул 2019 шинал кьамул дурсса «КIанттул сиптарду» тIисса, муниципалитетирттан ка-кумагрансса проект хъанахъиссар. Ванил мурадгу районнал экономикалун лябукку баву ва хъин чулиннайсса дахханашивуртту хьун даву бур.
Программа зузи дурния шиннай 1078 аьрза буллуну бур ваний гьуртту хьун. Миннува 534 проектран хIукуматрал чулухасса кабакьу бувну бур. Аьмну программа дузрайн дуккан дуван республикалул ва кIанттул бюджетрава итадаркьуну дур 3 млрд къуруш.
Проектрал лагрулий дуллай бур кIулшиву дулаврил, культуралул, спортрал идарарттал строительство ва цIу дуккан дуллай бур транспортрал, коммунал ва жяматийсса инфраструктура.
2026 шинал «КIанттул сиптарду» тIисса проект биттур даврин итадакьин ккаккан дурну дур 250 млн къуруш. Программалул лагрулий хьунтIисса конкурсрал хIасиллайн бувну, гьашинусса шинал 26 муниципалитетрай 54 проект дузрайн дуккан дан ккаккан бувну бур.
ХIажи Султановлул кIицI лавгунни республикалий ва ца яла тIалавмур проект душиву.
2025 шинал республикалул инвестициялул программа бартдигьаврин итадаркьуну диркIун дур 19,6 млрд къуруш. Вайннува 4 млрд къуруш дур федерал бюджетрава итадаркьусса ва 15, 5 млрд къуруш республикалул бюджетравасса. Программалул лагрулий дузрайн дуккан дурну дур 20 объект. Миннува Хасавюртуллал, Къарабудагъкантуллал, Къаякантуллал районнай бувну бур 2364 оьрчIансса кIантту бусса 9 школа, Дарбантлив 250 оьрчIансса кIантту бусса детсад, МахIачкъалалив цIу буккан бувну бур Аьралий савлугърал музей, Лакрал райондалий спортрал объект.
ХIажи Султановлул кIицI лавгунни халкьуннал багьу-бизу, маэшат хьхьичIунмай баву мурадрайсса миллатирттал проектру. 2026 шинал дузрайн дуккан дан ккаккан бувну бур миллатирттал 12 проект. Вайннун итадакьин ккаккан бувну бур 26 млрд къуруш.
Бувсуна республикалул маэшатраву ца яла хъунмурну хъанахъисса ЦIуссалакрал райондалийсса мурчай электростанциялул проект ци тагьарданий дуссарив.
«Инфраструктура для жизни» тIисса проектрал лагрулий республикалул транспортрал тагьар къулай даврин гьашинусса шинал тIалав дурну дур 800 млн къуруширттал.
Бувсунни кьатIувсса билаятирттащалсса дахIавурттаягу. Экономикалул чулуха вихшала дишин лайкьсса партнертал бур Ираннавасса, Авгъанисттаннаясса, Иракьнавасса, Гуржиянавасса, Арманинавасса, Азирбижаннавасса, Къазахъисттаннаясса, Беларусьнавасса, Китайнавасса ва Туркнавасса. ХIакьинусса кьини республикалул инпортрал ва экспортрал дахIавуртту дур 60-нния ливчусса билаятирттащал.
ХIажи Султановлул бувсунни Экономикалул министерствалучIа сакин бувну бушиву ялун бучIантIимур бусса, итххявхсса жагьилсса пишакартураясса группа. Ва даврил мурадгу хъанахъиссар жагьилтал региондалий каялувшиву давривух хIала буххан баву.
Идаралул даврил хIасиллая бувсун махъ, журналистътурал сулаллахьхьун жавабру дуллунни министрнал.
Ахирданий ХIажи Султановлул Барчаллагьрал чагъарду буллунна шинал лажиндарай министерствалул даврия буслай, чичлай бивкIсса СМР-лул зузалтран.
Имара Саидова
