Щарав
Щардал бакIчи Мирослав Ибрагьимовлул ккаккан дурунни махъсса шиннардий шяраву хьусса дахханашиннартту: бувсса объектру, ссукIуврайн батIайсса кIану, ремонт бувсса Магьирлугърал къатта ва библиотека, ттизаманнул тIалавшиннардацIун бавкьуну лащу-щаллу бувсса спортзал ва футболданий буккайсса майдан «Щара-Арена», ххюттурша инсаннансса тяхъашивуртту дайсса зал. Ванал чIурчIав дунни вай объектру шяравучутурал харжлухрацIух бувну бушиврий.
Муния махъ шяраваллил администрациялий хьунни агьалинащалсса хьунабакьаву. Шикку ххал бигьлагьисса яла агьамми буруккинтту бия ччя-ччяни тикрал хъанахъисса чани лещаврийн ва Щарату ШавкIрав нанисса ххуллу нигьачIисса бушиврийн багьайсса.
Энергосетирдал зузалтрал бувчIин бунни ччя-ччяни ттукI лешлай бушиврул сававну сетирдал участкардай хъанахъисса аварияртту ва микку дуллалисса технический давуртту душиву. Бувсунни ляхълай бушиву тагьар саргъун дансса чаранну.
Ххуллул хIакъираву тIурча, бувсунни буллай бяливчIсса ШавкIрату Щаравсса ламу цIуницIа буллай байбишинсса ххал бигьавуртту дуллай бушиву. Ххуллулмур тагьар ххуй дан бюхъан тIий бушиву бувсунни ххуллурдал зузалтрал так хъуннасса проектрал лагрулийну. Агьалинащалсса хьунабакьаврия махъ Зураб Куччаевлул делегациялущал ххал диргьунни шяраваллил администрациялул къатрал тагьар ва зузалтрал шартIру.
Хъирив Зураб Куччаев ивунни шяраваллил школалийн. Ххал бунни цифровой ва гуманитар кIулшиву дулаврил центр «Точка роста». Райондалул бакIчинан шикку ккаккан дурунни дуклаки оьрчIал кIулшиву дулаврин ва творчествалун цIу-цIусса каширду тIитIлатIисса ттизаманнул оборудование, хаснува асар биян бунни кIулшиву дулаврил процессраву хьхьичIунсса технологияртту ишла даврил хIасиллуну хьусса оьрчIал 3D-принтерданий дурсса давурттал.
Классирттал ялтту увккун, ххал дурунни методический пособиярттал лащу-щаллушинна, дуклаки оьрчIащал жап увкунни тIайлабацIурттая, гихунмай хьхьичI бихьлахьисса мурадирттая.
Хаснура къулагъас дурунни дуклаки оьрчIан дуллалисса дукралух – столовыйлул ва пищеблокрал ялтту увккун, ххал дурунни оьрчIан хIасул дурсса шартIру.
Ахирданий хьунаавкьунни педагогтурал коллективращал. Ххал бивгьунни кIулшиву дулаврийн багьайсса агьамсса масъалартту.
«ЧIалай бур школалул оьрмулул тарг, хIасул дурну дур оьрчIал гьунарду аьч бансса шартIру», – увкунни Зураб Куччаевлул хъирив нанисса ник тарбия даврил ва миннан кIулшиву дулаврил ххуллий гьарца кьинисса захIматрахлу учительтурахь барчаллагь тIий.
Муния махъ райондалул бакIчи ивунни Буттал кIанттул цIанийсса Хъунмасса дяъвилия зана къавхьуминнан дацIан дурсса гьайкалданучIан.
Мичча лавгун ФАП-райн, ххал дурунни медициналул зузалтрал шартIру, идаралул лащу-щаллушинна. КIицI ларгунни архсса щархъаву агьалинан цалчинсса медициналул кумаг баврил агьамшиву.
Агьалинал сукку бунни шяраваллил багъ цIу буккан баврийн багьайсса масъала. Зураб Куччаевлул хъинчулий ккавккунни жяматрал сипта, шяраваллил экономика хьхьичIуннай дансса ца чаранну багъгу хъанахъишиву ккаклай.
«Му хъинсса пикри бур. Багъ хьун аьркинссар шяравалу хьхьичIуннай даврил гьануну. Ва масъала личIину ххал бигьинну Шяраваллил хозяйствалул министерствалущал, сипта чулийн дуккан дансса каширду лякъиншиврул», – увкунни райондалул бакIчинал.
«Щардал шяравалу дур цилла цурда цIу дуккан дуллалисса, цилла цурда ччаннай дацIан дуллалисса. Агьали цачIун хьуну, цала гужирдацIух ва каширдацIух спортзаллу, стадионну, 500 инсаннансса банкет заллу буллай, ххуллурду цин лархьхьусса тагьарданийн буцлацисса шяравалу – мури цила бикIайкунсса кIанттул цилакаялувшинна. Щардал шяраваллил эбратрай жущава бюхълай бур ккаккан дан сиптарду зузи дайсса куц. Зул цашиву ва гьавас – му хьхьичIунмай шавринсса гьанур. Властьралмур мурад тIурча, кIанттул гужирдацIух ка хъирив къалаллалимунин кабакьу бавур: инфраструктуралийн ва хъунисса проектирдайн багьайсса суаллу щаллу бан, учиннуча ламу бан, багъ цIу буккан бан. Барчаллагь хъунмасса зул захIматрахлу ва зула шяраваллийн дакI тIайлашиврухлу», – ххи бунни Зураб Куччаевлул.
ГьунчIукьатIув
Лакрал райондалул бакIчинал цалчинма-цалчин ххал бунни хьхьичIвасса школалул къатраву бивхьусса спортзал. Тренер Юсуп ТIагьировлул бусаврийн бувну, хIакьину шикку дусса шартIирдацIух зий бур жагьилтурансса спортрал секцияртту. Амма къатраву дакъар къулайсса шартIру. Администрациялул бакIчи МухIад Штанчаевлул тавакъю бунни къатри цIу дуккан дан.
Зураб Куччаевлул кIицI лавгунни жула зунттал чару цIувцIуну бувсса объектру цIана нажагьссавагу бакъашиву. Вай къатри цIу дуккан дан кабакьу бан махъгу буллуну, тапшур бунни къатри ва аьрщи сияхIрайн ласун. Шяравух уклай унува райондалул бакIчинал ххал бунни шяраваллил ттучан, волейболданий буккай майдан.
Ивунни ларгсса шинал цIу буккан бувсса Магьирлугърал къатлувун. Шивува бивхьуну бур музей ва библиотека. Музейраву Зураб Куччаевлул ххал дурунни шяраваллилгу, райондалулгу цIа щала билаятрайх машгьур дурсса инсантурал суратру. Вайрив ГьунчIукьатIув чансса бакъар: Аьрасатнал ПаччахIлугърал премиялул лауреатътал МухIаммад Дандамаев ва Амир Аммаев, Совет Союзрал ЗахIматрал Виричу Гъази Хинчалов ва чIявусса цаймигу аьлимтал ва цивппа зузисса кIанттурдай цIа бусравсса пишакартал.
Ххал дунни Магьирлугърал къатлул технический тагьар. Хаснура къулагъас дунни библиотекалух. Райондалул бакIчи рязину ливчIунни библиотекалул зузала Жамилат Юсуповая, тапшур бунни ванин райондалул цIания барчаллагь баян бан.
Мичча ФАП-райн лавгун, медициналул зузалтрал шартIру, идаралул лащу-щаллушинна ххал дуллай бунува, кIул хьунни шикку акъашиву фельдшер.
Архсса щархъаву агьалинан цалчинсса медициналул кумаг баврил агьамшиву кIицI лаглай, тапшур бунни ва суал хасъсса къулагъасралун ласун, ччясса мутталий фельдшер лякъин. Мукунма тапшур бунни идаралийн канализация дуцин.
Муния махъ Магьирлугърал къатлуву хьунни агьалинащалсса хьунабакьаву. Шикку ххал бигьлагьисса яла агьамми масъалартту бия аьрщи сияхIрайн ласаврийн, хIатталлийн нанисса ххуллу бакьин баврийн, хIачIайсса щин диял хъанай дакъашиврийн багьайсса.
Зураб Куччаевлул администрациялул пишакартурайн тапшур бунни кIицI лавгсса гьарца суал ххал бивгьуну, ми щаллу бансса чаранну лякъин.
Хъирив Зураб Куччаев ивунни шяраваллил школалийн. Хаснура къулагъас дурунни дуклаки оьрчIал мюхчаншиврул ва къулайшиндарал шартIирдах, дуллалисса дукралух.
Классирттал ялтту увккун, ххал дурунни методический пособиярттал лащу-щаллушинна. Гьарца классравух увккун, дуклаки оьрчIащал жап увкунни тIайлабацIурттая, гихунмай хьхьичI бихьлахьисса мурадиярттая. Гьарца хьунабакьаврий, оьрчIахь маслихIат бунни лакку мазрахссагу, буттал кIанттухссагу ччаву дуруччин.
Лакрал литературалул дарсирай луттирду бухсса ккавккун, кIулшиву дулаврил идаралул пишакартурайн тапшур бунни хъирив буккан.
Ряххилчинмур классрал оьрчIаннив га кьинисса алгебралул дарс абадлий дакIния къадукканссар – доскалий уравнение дуллалисса оьрчIал канища мелгу лавсун, дурчIин дунни формулартту.
Ахирданий педагогтурал коллективращал хьунаавкьуну, ххал бивгьунни кIулшиву дулаврийн багьайсса агьамсса суаллу, кIицI ларгунни школалул къатрал технический тагьар цин лархьхьусса дакъашиву. КIулшиву дулаврил управлениялийн тапшур бунни вай диялдакъашивуртту духлаган даврил ялув бацIан ва ччясса чIумул мутталий хIадур дан ремонт дансса давурттал смета. КIицI лавгунни школалул инфраструктуралул тагьар цала итталу душиву.
Хьунабакьаврийн бавтIсса агьалинавух ия 2022 шинал ссуттил хасъсса аьралий операциялий ватандалул мурадру буручлан лавгсса Рашид Кадыровлул ппу Шихамир.
Ца талатавриву Рашидлуйн кIусса щаву дирну дур. Амма ази лагавривун цIунилгу кьюкьлувун зана хьуну, биттур буллай усса ур аьралий мурадру. Зураб Куччаевлул цIухху-бусу бунни аьралийчунал цIуллу-сагъшиврия, кулпатрал буруккинттая. Барчаллагь увкунни ватандалул махъ ацIансса лайкьсса арс тарбия аврихлу.
«Рашид – хIакьсса виричури. Щаву диярчагу, яхI къагъавгъун, цIунилгу кьюкьлувунай зана хьуну, чувшиврий ватандалул мурадру буручлай ур. Жу пахрулий буссару жула ватанлувтурая. Ччясса мутталий зана хьуну ккакканнав сагъ-саламатну, ххувшавугу ларсун», – увкунни райондалул бакIчинал.
Зулайхат Тахакьаева
