Ларгсса бигьалагай кьини МахIачкъалаливсса «Центр» тIисса ресторандалуву «Лакрансса диндалул кумаг» группалул 5 шинал юбилей кIицI лаглагисса мероприятие хьунни. Ва группа хасну лакрал миллатрансса хъиншиврул, хъинбалдарал ххуллийсса давуртту дуллан хIасул бувну бур ЧиркIайннал шяраватусса ярудушнил, ПатIима-Загьра Жамалуттиновал.
Душру барчагу бувну, бюххансса ихтилатру бунни Дагъусттаннал Муфтиятрал Централ территориал округрайсса вакил МухIаммад Майрановлул ва Лакрал райондалул имам ХIабиб Батталовлул.
Группалул вакилтурал бувсунни, сбор дурну дартIцири арцу харж дувайшиву, просвещениялул отделданущалгу маслихIат ккавккуну, ихIсандалул акциярдан, Ккуллал ва Лакрал районнай ислам машгьур дуваншиврул аьркин дагьлагьисса диндалул литература машан ласун, мюхтажминнан кумаг буван.
Группалул администраторнал сипталийн бувну, душваврансса ххуйсса программа хIадур дурну дия Дагъусттаннал Муфтиятрал просвещениялул хъаннил отделданул. Мероприятие дачин дурну бия исламрал журналистка Эльмира Нуруттинова. Программалул гьанумур темагу дия, чIивисса, хъунмасса къакуну, ччимур журалул кумаг, цадакьа Заннал рязишиву хIалал дансса ххуллийсса даву душиву, бувсса кумаграву барачат бушиву, чин кумаг бувманан Занналгу кабакьу байшиву. Бия ихтилатру оьрчIан рувхIанийсса тарбия дулавриву ниттихъал бияла хъунмасса бушиврия, оьрчIнияцIава оьрчIан исламрал кIулшивуртту дуллан аьркиншиврия, ми тIайласса ххуллия къабаччаншиврул.
РувхIанийсса ххазинарду хьхьичIунну бикIан аьркиншиврия, мяърипатрая, хъинмунивух хIала буххаврийну оьрму чаннайн буккайшиврия бия Мариян Илиясовал цIанийсса «Дараччи» фондрал хъунмур Гульшан Хасаевал, философиялул элмурдал доктор Асият Буттаевал, ОьрчIансса стоматологиялул поликлиникалул хъунмур хIакин ПатIимат Башировал, Аьрасатнал Виричу НурмахIаммад ХIажимахIаммадовлул нину, МахIачкъалаллал школалул директор Сапижат Мазаевал ва цайминнал ихтилатру.
«Лакрал миллатран диндалул кумаг буллансса группалул цIа дуссар социал сетирдай «Нюжмаркьини – цадакьалул кьинир». Ва группалуву яруссаннал, цайми миллатирттал душругу буссар, вайннул мурадгу лакран диндалул ххуллий ка-кумаг буллалавур. Лаккудушругу чансса бакъар, хъин-хъинсса давуртту дуллалисса. Ва жулла ккуран уттигу хъунна хьунссар тIий бура. Мероприятиялийн бувкIцириннайнгу, мудан чIарав бацIлацIиминнайнгу барчаллагьрай бура. Лак гьармуниву мудангу хьхьичIунну бивкIссару, исламрал давривугу, хъиншиврул ххуллийсса давурттавугу жувагу хIарачат буллантIиссару», – тIий бур Лакрал райондалийсса просвещениялул хъаннил отделданул вакил
ПатIима Аьлиева.
ПатIимат Рамазанова
