БувкIунни гьарцагу бусурманчувнан ххирасса, зурдардиву яла бусравсса Рамазан барз. Исламрал календарьданул урчIулчинмур барз, цил 30-гу гьантлий гьарцагу бусурманчув буржлувсса диндалул ххюра рукнулувасса ца – зума дугьаву щаллу дуллан. ХIарачат буванну ва барз шайссаксса мюнпатну гьан буван.
* * *
Рамазан зурул цалчинсса шанма гьантта ккаллину бур яла захIматминнун, хаснува цалва оьрмулуву зума цалчин дугьлай байбихьлахьиминнан. Зума дугьлай байбишиннинсса ца агьаммур кIанугу – му ниятри, инсаннал зума дугьансса гъирар, цащара зума дугьан хьуншиврий дакI кьянкьану ацIавур.
* * *
Рамазан барз – ва анжагъ дукралия ва хIачIиялия махъаллил шайсса барз бакъар. Ва инсаннал дакI марцI дуккан дувайсса, инсан вивхчин лиян уллалисса цимурцаннуя махъаллил шайсса барзри: сситтуя, щялмахъирттая, тIайладакъашивурттая, пахру-ххаралия, дакI хъуншиврия, цIими бакъашиврия ва м.ц. Мунийн бувну, зума дугьаву хъанахъиссар инсан цалла дакIнил ялув цува ацIаву.
* * *
Рамазан зурул агьаммур мурадну хъанахъиссар инсаннан цалла кIулшилийну, мяърипатрайну бувчIлачIаву гьарца цалва увкусса мукъухлу, бувсса пикрилухлу, дурсса даврихлу жаваб дулун багьантIишиву. Нигь дуну акъача, цала хушрай, кIулши дуну, виваллил этика дуну, яхI-намусрайну оьрму бутлай, рувхIанийшиврул чулуха ивну, хъуна хьуну.
* * *
Рамазан зуруй дурсса ца яла ххуймур даврин ккаллину дур мюхтажминнан ка-кумаг баву. Чивчуну бур, МухIаммад идавс (с.аь.в.) яла-яла ва зуруй ивкIшиву мяш акъа, ка тIиртIуну къуццу тIий.
Хасну ва зуруй бувсса цадакьалухлу, дурсса хъинсса давурттахлу Аллагьнал мяш акъа дулайссар цамур чIумал къадувайсса бахшишру, ялтту учIайссар цала лагътурал. Ятинтуран, щахъаннин, миски-гъаривнан, буржиралун агьманан кумаг бувну, бюхълай бур вай багьа бакъасса бахшишру хIалал дуван.
* * *
«ЧIявусса гъалгъа тIима чIявуну аьгу-аьйкьайссар». Ва зуруйгу, махъсса цайми зурдардийгу инсаннан кьаивкIун хъинссар, так хъинмур, ххуймур, мюнпатмур тIутIисса чIунну личIаннин.
* * *
Ва зуруйгу, мудангу баччибакъулшиврун, пикри бакъашиврун ккаллиссар чак къабуллалаву. Мукунна баччибакъашиврун ккаллиссар чак анаварну, пикри къабувну, къадакIнийхтуну бувну кьабитаву.
* * *
Ва зуруй шайссаксса чIяруну Аллагьнал цIа зумух ларсун, Кьуран, личIи-личIисса зикрирду бувккуну, диндалул ва рувхIанийшиврул ххуллийсса цайми-цайми давурттугу дурну хъинссар. Ва барз хьун аьркинссар щалла шинал мутталий диндалул ххуллийх лайкьсса даражалий бачинсса рувхIанийсса гужрал бакIщаращину.
Гихунмайгу буссар.
ХIадур бувссар
Бадрижамал Аьлиевал
