Февраль зурул 2-нний МахIачкъалалив, «Шантэль» тIисса Художникнал къатлуву хьунни жулва лаккудушнил, Аьйшат Расуловал назмурдал вечер.

Аьйшат психологри, чичай ванил оьрус мазрайсса назмурдугу. Цилва тIийкун, инсантурал дакIурдичIан поэзиялул мазрай ххуллу лякъинсса ца чаран хIисаврай. Аьйшатлул ппу Алхас Цалчинмур ЦувкIратуссар, нину Ирина – Ваччатусса. Цу­ппа Аьйшат яхъанай ва зий бур Каспийскалив. Мукьва оьрчIал нинур. Лас Ренатгу Аьйшатлул дуллалисса гьарцагу даврил цIакьсса чIарахацIур. Вайннал ташу бувну 20 шин хъанахъисса 2025 шинал хIасул бувну бур кулпатирттан ташу ябан кумаг бу­ллансса, бавкьуну, нахIуну яхъанансса маслихIатру буллали­сса центр: «Академия семейного наследия».

КIицI къалавгун битан къабучIир, Аьйшат Аьрасатнал ниттихъал «Шинал Нину – 2022 шин» конкурсраву ххув хьушивугу.
На Аьйшатлул вечердания бусланнин, ванил пишалия, даврия бусласиссагу, психологнал даву ванил назмурдал мяъна-мурадирацIун даркьу­сса дунутIийра. Профессионал психолог ва шаэр хIисаврай ванил дуллалимунил гьанумур мурадгу, на нукIувагу кIицI лавгсса куццуй, ца ххуллийсса дур, му ххуллийнгу «стихотерапия» тIий бур.
Ххирар Аьйшатлун гьармунивува сахаватну дарувсса терапиялул къяртри дачIлан. Инсантурал дакIру таза дуккан дуллан.

Таксистнал навигатор къа­тIайлану зий дур куну, Ломоносовлул цIанийсса кIичIираву кьабивтсса на Гагариннул кIичIиравусса Художникнал къатлух луглай, занай бура та кьини. Цаппара хIалатрава хIисав хьунни машиналува буклакисса жалин. ТIутIал чIапIращалсса гьалмагъайгу чIарав ур. Лагма-ялттусса машинартту бацIан буллай, вайннахь ташу барча буллалисса чIурду баллай бур. Утти вайгу нава нанисса ххуллу бугьлай бур тIий, бура рязий бакъа ттувува нава, вечерданийн чIал хьунугу къаччай. ЧIаравнмай шайхту, чIу бувчIуну бурувгсса: бакIрая ччаннайн бияннин кIяла лаххиялувусса «жалин» лявкъунни Аьйшат. Художникнал къатлул азваргу лявкъунни ва лихъа-хъирив хьуну нанисса аьла­гъужасса дунияллий ца паракьатсса ва аьнтIикIасса мурцIу. Гьарца матахIраву, детальдануву классикалул ках бусса. Залданувун бувххун наними хьунабакьлай бия тIутIащал. Ттурша инсан ухьунссия залдануву.

Гьарманал канивугу кьанкь ххуй хъункIултIутIив. ХIат-хIисав дакъасса хъамул чирахъру. ТIааьнну экьинанисса музыка.
Гьамин, фортепианолул ва флейталул макьандалухун ккалай бивкIунни Аьйшат Расулова назмурду. Авторнал сайки циняв шеърирду бур абадлий кьиматрайсса ххазинардал тема аьч дуллалисса: ниттихасса, оьрчIахасса, ччаврихасса, хъиншиврухасса, ххуйшиврухасса. Назмурду цирдагу дурккунни Аьйшатлул бутIрайх дарчIуну. Яла хъунмур бутIа ванил назмурдаву бур нинушиврул асардан хас бувсса: «Мабулларду оьрчIру, бувай аьдатран, Мабулларду оьрчIру, буван чIунни тIий, Заннал бахшиш дурну, оьрчI буллухьурча, Щукрулий ябара буллу ххазина!». Ягу: «Чуврив нину дуссар мякьну ялугьлай, Арсная ттюнгъасса махъру баяннин, Ниттихлу нянягу щиллив ужагърай, ЧIивитIуйх ках тIиссар, шанавун гьаннин». Ванил ккалаккисса назмурдал асар хъиннува ярг буллай бия музыкантътуралгу– пианино бишлай бия МахIаммадова Жамила, флейта – ХIайдарова Гуля. Вечер дачин дурнугу бия Тасним Бадруттинова.

Аьйшатлул цилва бакъагу, ванил лакку мазрайсса назмурду дурккуна буттарссу Ирина Буттаевал. Вагу назмурду чичаврил гьунар бусса бур. Дуккав нагу нара лакку мазрайн таржума дурсса Аьйшатлул назму «Лагабаргъгу лагай, кIюрхгу итххяххай». Дурккунни яру мазрайгу ванил творчество ххирасса Шамиллул. Лях-карах магьирну къавтIий бия балерина Лайлигу.
Аьйшат барча бунни машгьурсса шаэр, публицист, литературовед Миясат Муслимовал. Ванил чIурчIав дунни хIакьинусса кьини, музыка, балет, эстетика хIаласса поэзиялул вечерду сийлувун дагьлай душиврий, инсантурайн вечерданийн оьвтIисса бахшиш-билетрая тIайла хьуну, Аьйшатлул гьарзатрал хIисав ларсун, аьнтIикIасса вечер бавтIцириннан пишкаш дувансса хIарачат бувну бушиврий.

Философиялул элмурдал доктор Асият Буттаевал маслихIат бунни, Дагъустта­ннал Чичултрал союзраву жагьилсса чичулт чанну бур тIий бухьувкун, Аьйшатгу, ва кунмасса цаймигу жагьилсса гьунар бусса чичултгу кIункIу буллан. Бувсунни Аьйшатлул нину Ирина КьурбитIаева медицина хьхьичIуннай давриву бутIа бивхьусса хIакин-вирусолог, Дагъусттаннал лайкь хьусса хIакин бушиву, Иринал ппу, Дагъусттаннал лайкь хьусса учитель Адамов ХIажигу, гьунар бусса журналист, чичу ивкIшиву, Аьйшатлунгу назмурду чичаврил гьунар ирсирай ттаттая бивсса бушиву.

Дагъусттаннал Чичултрал союзрал хъунаманал хъиривчу Супиян Оьмаровлул бувсунни цува ва Аьйшатлул ппу Алхас (аьпа биву) студент заманнайвасса цIакьсса гьалмахтал бивкIшиву, дуснал душнил творчествалул хъиривгу авцIуну ушиву. Ванал кIицI лавгунни цува Алхасгу ххаллил­сса инсангу, хъунасса патриотгу ивкIшиву, ЦIувкIуллал ва Ваччиял жяматрал, Каспийскаливсса лакрал оьрмулул иширттавугу мудангу чялишну хIала уххайсса активист ивкIшиву.
Вечер дусса кьини Аьйшат дунияллийн бувксса кьинигу духьувкун, бюххансса мукъурттий ва барча бунни ниттил Иринал, ласнал Ринатлул, ласнал ниттил Зулмирал, цаймигу гъан-маччацириннал, даврил уртакьтурал.

«На ххарину бура Аьйшатлул укунсса поэтический сольный проектру машгьур хъанай душиврия. Ва цалчинсса проект дакъар. Ванил назмурду чаннасса ва тIайласса дур, ххуймунил, хъиншиврул ххуллийн буккияра тIисса дур. Ккалаккиманал ва вичIи дирхьуманал дакIнийгу бюххансса асарду кьабитлатисса. Ва кьини бучIан къавхьусса инсантурал миннатрайн бувну, уттигу тикрал дувантIиссар», – увкунни Ирина Буттаевал.

«На вечерданийн бувкI­цириннайн бюххансса асардал терапиялул дозарду бивхьунссар, ва зун дакIний личIанссар тIисса тамахIрай бура. Ттул творчествалул гьанумур мурадвагу инсантурал дакIурдивун хъиншиврул, хъинбалдарал гьанна зизин буванссар. ЧIярусса шиннардий психологну зий ттун хъинну ххуйну бувчIунни, инсантурал оьрмулуву яла диял къахъанахъимур душиву хъиншиву, ччаву, хIурмат. Буса-учинмур аьщу­йн щуну, асар хьунну учинсса кумагчиталли ттул назмурду. Барчаллагьрай бура ва вечер лайкьсса даражалий тIайла дуккан захIмат бувцириннайнгу», – увкунни Аьйшатлул цилва кумагчитурахьхьун Барчаллагьрал чагъарду ва бахшишру дуллай. Вагурхха бувмур бусрав шайшиву ккаккан буллалисса ца ххуйсса хасият.

ПатIимат Рамазанова