Январьданул 28-нний Вихьуллал шяраву хьунни агьамсса иш. Ва бучIину бухьунссар шяраваллил тарихрал луттирайн лахъан буван.

Вихьлив цалчинсса школа тIивтIуну бур 1928-ку шинал. Школа бувну бур «халкьуннал стройкалул» лагрулий. Школалий дуклаки оьрчIру гьарза хъанан бикIайхту, вара «халкьуннал стройкалул» лагрулий бувну бур цаймигу корпусру. Бур «Финский къатрал» лагрулий бувсса цамур корпусгу. 1960-ку шинал Вихьуллал школалийсса дуклаки оьрчIал сияхI лархъун дур 700-ннийн. Тай шиннардий бивкIун бур шяраву интернатгу.

АцIунния лирчусса шиннардил хьхьичI буллай байбивхьуну бур ХIукуматрал харжирацIух 220 дуклаки оьрчIансса, кIира зивулийсса школа. Амма, личIи-личIисса багьантту хьхьичIун багьлай, дахьра ца зиву школалулгу, спортзалданул чIирттугу бувну, давуртту дацIан дурну дур. ДукIу, инттухунай Дагъусттаннал ХIукуматрал председатель Аьбдулмуслим Аьбдулмуслимов Гъумукун увкIсса чIумал, ванащал хьунаавкьуссия Вихьуллал школалул директор ­Аьлил МахIаммадов, бувссия школа бацIан бавриясса ихтилат. Вания махъ арцугу итадаркьуну, майрай байбивхьуна цIусса школа буллай. Дуруна кIира зивулийсса школалул къатри, бувуна спортзал. Дирхьуна классирттаву партарду ва щаллу дурна цаймигу аьркинлугъ. Стройкалулми давуртту дузал дуршиврийн бувну, лента къакьувкьунува, школа тIивтIуна. Ва тIитIавугу дурна дистанцион манзилданий Дагъусттаннал бакIчи Сергей Меликовлул.

Ца классравун бавтIуна дуккавриву хьхьичIун ливчусса классгу, ванил каялувчи Мадина Амираьлиевагу. Школа тIитIлатIисса шадлугърай гьуртту хьуна Ккуллал райондалул бакIчи Ажуб ХIусманов, администрациялул пишакартал Сулайман ХIусманов, Рашид Сулайманов, Абусупиян Аьбдуллаев, райондалул Депутатътурал Мажлисрал председатель Гъази Оьмаров, КIулшиву дулаврил управлениялул каялувчи Жамалуттин Оьмариев.
Шяравусса цIусса школалия цивппа рязину бушиву бувсуна школалий хьхьичIунну дуклакисса ХIажимурад ХIажиевлул. Райондалийсса тагьардания ихтилат бувна Ажуб ХIусмановлул.
Муния махъ цинявппагу лавгуна «ххюйлчинмур» дарсирайн.

ХIажимурад ХIусайнов,
ш. Вихьул