Щалагу Аьрасатнаву нанисса «Классная встреча» проектрал лагрулий чувшиврул ва дакIнин бичаврил дарсру дирхьунни ЦIуссалакрал райондалийсса ЦIуссачIурттащиял 2-мур школалий. Чувшиврул ва къучагъшиврул дарс дирхьунни ДР-лул НКО-лул Координациялул советрал председатель Шамил Хадулаевлул ва ЦIуссалакрал райондалул бакIчинал хъиривчу, авгъан дяъвилул ветеран Арсен Гъазиевлул.

Буттал кIанттул цIанийсса Хъун дяъвилий къучагъну талай бивкIсса вирттаврая, Украиннал аьрщарайсса тагьардания, хасъсса аьралий операциялул агьамшиврия ва жула аьралийтурал чувшиврия бусласисса ихтилатру бунни хъамаллурал .
– ХIакьину жува дакIнин бичлай буру билаятрал тархъаншиву ва цашиву дуручлай бивкIми. ЦIанасса никирангу кIулну бикIан аьркинссар ва эбратну хьун аьркинссар жула вирттал. Жагьилтал – жула бучIантIимурди. Вайннал тарбиялухсса жула къулагъасгу дикIан багьлай бур хъуннасса, хаснура ватан ххирану тарбия баврих, – увкунни Шамил Хадулаевлул.

Дуклаки оьрчIалгу бувсунни Ватандалул мюхчаншиву дуруччаврил ххуллий хасъсса аьралий операциялий аьралий бурж бартбигьлай чувшиврий жанну дуллусса ЦIуссалакрал райондалиясса къучагътурая.
Ахирданий дуклаки оьрчIал ва хъамаллурал рирщунни дакIний личIансса суратру.