Вай гьантрай Красноярскалий къуртал хьунни лачIун буккаврил дунияллул халкьуннал дянивсса Иван Ярыгиннул Кубокрал турнир.

2026 шинал хьусса турнирданий гьуртту хьуну бур уттинин хьусса шиннардийнияр чIявусса лачIунбуккулт – 486. Ми бувкIун бивкIссар 21 билаятрая: Азирбижаннава, Беларусьнава, Болгариянава, Бразилиянава, Грециянава, Гуржисттанная, Египетнава, Индиянава, Китайнава, Кубанава, Къазахъисттанная, КНДР-нава, Кореянава, Къиргъисттанная, Мангъулнава, Аьрасатнава, Ух­ссавнил Македониянава, Таджикисттанная, Туркманисттанная, Турциянава ва Узбакисттанная.
Арамтурал турнирданий лачIун увккун ур 322 инсан 19 билаятраясса. Арамтурал дянив яла машгьурмур диркIун дур 74 килорал кIушиврулсса, ваний гьуртту хьуну ур 10 билаятраясса 40 спортсмен. КьатIаллил билаятирттая яла чIявуми лачIунбуккулт бивкIссар Мангъулнал командалуву – 51 спортсмен. Ва командалул ва Аьрасатналссаннул кка­ккан бувну бия цала спортсментал 10 чурххал кIушиврий.
Дагъусттаннал лачIун­бу­ккултрал дурххуну дур 20 медаль: 6 мусил, 6 арцул ва 8 чарвитул. Жула командалул бувгьуну бур цалчинмур кIану.
Мусил медальлу дурххуну дур Башир МахIаммадовлул, АхIмад Усмановлул, Ибрагьим Кьа­диевлул, Аманулла ХIажимахIаммадовлул, МухIа­ммад-ТIагьир Ханиевлул ва Шамил Мусаевлул. Жула лаккучу Ибрагьим Ибрагьимовгу лайкь хьуну ур арцул медальданун.
ХI.Аьдилов