Совет Союзрал кIийла Виричу (1943 ш., 1945 ш.), СССР-данул лайкь хьусса летчик-испытатель (1961 ш.), подполковник (1957 ш.), аьралий лётчик, ссавруннал ас АхIмад-Хан Султан 55 шинал хьхьичI, февраль зурул 1-нний ххал дигьлагьисса самолет дагьну, оьрмулуцIа хьуссар.
Каспийск шагьрулул 8 -мур лицейраву Совет Союзрал кIийла Виричу АхIмад-Хан Султан дунияллия лавгун 55 шин хъанахъисса февраль зурул 2-мур кьини ва дакIнин утлатисса мероприятие хьунни.
Дяъви нанисса ппурттуву ва 603-мийла гьаз хьуссар гьаваллавун душмантуращал талан, 150-лийла данди увкссар душманнал самолетирттайн. Руртссар 30 душманнал самолёт, 19 самолёт тIурча – гьалмахтуращал уртакьну. Ялар ванал оьрмулул тарих лавхьхьуминнал, «дуртсса самолётру дустуран пишкаш дуву» учинтIиссагу, цIардугу, цIурттигу гьалмахтурангу дикIувча тIисса кьяйдалий. Укун чумартсса дакIнил заллу ивкIссар ва.
АхIмад-Хан Султаннул ссукIуврай ванал гьалмахчунал, Совет Союзрал Виричу Владимир Ильюшиннул: «АхIмад-Хан Султан кIийла Виричу акъар, мукьийла Виричури», – увкуну бивкIссар. (Къиримнал чичултрал Симферопольлай 2012 шинал итабавкьусса «Амет-Хан Султан – гордость Крыма» тIисса луттирай бувсун бур ва иширая.
«АхIмад-Хан Султан ххишала акъа сивсусса, вас-ццах бакъасса ушивруцIун, дакI хъинсса, цIими бусса икIайва. Мюхтажнан кумаг бувайва, цичIар ххира къадурну. Нагу депортациялуща ххассал бувссара 1946 шинал, Алупкалийсса цала ниттичIан, ттулла буттарссу НасибачIан биян бувну. Дустурал, гьалмахтурал цIа дулларча, ламусравун агьлан икIайва, пахрулул кьанкь дакъасса ия», – тIий бур Виричунал ссурахъу Алла Аппазова. Ттул ванищал дахIаву дур, оьвчару, чичару, ва буссия АхIмад-Хан Султаннун ЦIувкIрав гьайкал тIитIлатIисса шадлугърай, цал уттигу ЦIувкIрав биян хьурдай тIий бур. Мудангу барчаллагьрай бур Къиримнал агьалинащал архIал Виричунал цIа зумату щяв къадихьлахьисса Дагъусттанналми агьалинайнгу.
Машгьурсса журналист Бутта Буттаевлул АхIмад-Хан Султаннул оьрмулиясса лу гьашину цIуницIа итабакьинтIишиву бувсунни чичул наслулиясса Александрал.
АхIмад-Хан Султан – чувшиврул, сисаврил ва Ватандалухсса куртIсса ччаврил эбратри, ва бюхттулсса хасиятрал лишанни, гьар чIуннардий ва гьарца халкьунначIа хIурматрай диркIссар ва дикIантIиссар.
АхIмад-Хан дакIнин увтунни АхIмад-Ханнул цIанийсса
Каспийск шагьрулул 8 -мур лицейраву Совет Союзрал кIийла Виричу АхIмад-Хан Султан дунияллия лавгун 55 шин хъанахъисса февраль зурул 2-мур кьини, ва дакIнин утлатисса мероприятие хьунни.
Ва лицей цуппагу Виричунал цIанийссар, укунсса мероприятиярттугу ччя-ччяни дувайссар бусравсса инсантурайн ва ЦIувкIуллал шяраваллил вакилтурайнгу оьвкуну.
Лицейравун бавтIун бия хьхьирил авиациялул ветерантал, СВО-лий ливтIусса чиваркIуннал мачча-гъанми.
ТIутIив дирхьунни школалул хIаятравусса Виричунал гьайкалдануцI, дуклаки оьрчIал дурккунни Виричунан хас дурсса назмурду. Аьдатрайн бувну, кьамул бунни «Аметхановцы» кьюкьравун чIава патриотътал.
Авиациялул Ветерантурал советрал сипталийну Каспийская флотилиялул вакилтуращалсса хьунабакьавугу дунни вара кьини лицейраву. Хъамаллуравух бия «Дагъусттаннал авиатортал» проектрал хъунама, кIицI лавгсса лицейрал выпускник Валиев МахIаммад, летчик Корпенко Александр, майор, эскадрильялул штабрал хъунама Серкилов ХIажи, аьралий хьхьирил флотрал ветеран Ажуев Шяпиуллагь ва цаймигу бусравсса инсантал. Хъамаллурал бувсунни АхIмад-Хан Султаннул гьунардая. Ванал цалва оьрмулуву кьабивтсса асардал биялалия.
Бусанна вара кьини Москавлив Виричу увччусса Новодевичье хIатталив ванал гьаттацI тIутIив дишин бившиву Цалчинмур ЦIувкIуллал диаспоралул вакилталгу, укуннасса мероприятие хьушиву Цалчинмур ЦIувкIуллал школалийгу.
ПатIимат Рамазанова
