Январьданул 29-нний Дагъусттаннал парламентрал спикер Заур Аскандаровлул каялувшиврий хьунни Халкьуннал Мажлисрал 51-мур сессия.
Ваний гьуртту хьунни Дагъусттан Республикалул бакIчи Сергей Меликов. Сессиялий гьуртту хьунни мукунма ДР-лул ХIукуматрал члентал, исполнительный властьрал органнал каялувчитал, ДР-лул бакIчинал Халкьуннал Мажлисравусса вакил Нюсрет Оьмаров, СВО-лул Аьрасатнал цалчинма Виричу НурмахIаммад ХIажимахIаммадовлул нину Сапижат Мазаева, властьрал федерал органнал вакилтал, «Доблесть гор» кадрардал программалул гьурттучитал, жяматрал чулухасса вакилтал.
БавтIминнал хьхьичI махъ лавхъунни Сергей Меликовлул. Ванал тIимунийну, билаятрал президент Владимир Путиннул баян бувсса Аьрасатнал Халкьуннал цашиврул шинал личIинурасса мяъна дуссар жула республикалун, Аьрасатнал чIявумиллатру бусса регион хIисаврай. «Жула щала билаятран Халкьуннал цашиврул шин – хъанахъиссар виваллил ва кьатIаллил вызовирттайнсса уттигу ца жаваб», – увкунни региондалул бакIчинал.
Сергей Меликовлул баян бунни Дагъусттаннай дайдихьлахьишиву Аьрасатнал Халкьуннал цашиврул шин.
«Лишаннусса иш хъанахъиссар Буттал кIану буруччул шин Аьрасатнал Халкьуннал цашиврул шинайн дуккаву, жямат цачIун баврил пикри-зикрирдугу хьхьичIунмай бачин буллай. Жува куннал яруннавун кув вихшалдарай буруглагиссаксса, жува цинявннаяр ххувссару», – увкунни махъ лахълахъиманал.
Дагъусттаннал бакIчинал бувсунни миллатирттал цашиву яла гужмур ярагъ хъанахъишиву.
«ЩищачIав къашайссар жуярва ххув хьун, жува цачIу буссаксса. Оьруснал аьралийчунал бусурманчунал чаклил къаралданий уссаксса, ххачпараснал кашиш ва бусурманнал имам жула саллатIнаха чак буллай, алхIам ккалай буссаксса, жува куннал кув яруннавун вихшалдарай ва хIурматрай буруглай буссаксса жува ххувссару», – увкунни республикалул бакIчинал.
– Жува хIакьину цIунилгу исват буллай буру жула кьянкьашиву, жуйнна дуллалисса вызовирттал хьхьичI цIакьну бацIан бюхъаву. Ккаккан дуллай буру жула кьянкьашивугу, цIакьгу СВО-лул зоналийсса жула аьралийтурал къуццулийну. Тикку бартлагантIиссар циняв жула мурадру. Жува циняв пахрулий буру жула вирттаврая, цачIу кабакьлай буру жула аьралийтурацIун, цIусса регионнал ялапарлувтурацIун мукъуйнугу, иширайнугу», – увкунни Сергей Меликовлул.
Аьрасатнал Халкьуннал цашиврул шинал лагрулий Дагъусттаннал бакIчинал бивхьусса задачартту бартбигьавриву депутатътурал бугьлагьисса кIанттул хIакъираву Заур Аскандаровлул укун увкунни:
«Депутатътурал личIинувасса кIану бугьлагьиссар. Жуватува гьарцама цIакь увну ур цала райондалуцIун, шагьрулуцIун. Гьаманки, кIантту-кIанттурдай, инсантуращал дахIаву дуллай ялун личайссар бунияласса цашиву. Жура дуллалисса давурттайну, масъалартту бартбигьаврийну кумаг хъанан аьркинссар бунияласса захIматшивуртту духлаган дуван, мунийну цIакь дуллан республикалул ялапарлувтурал дянивсса вихшала ва куннан кув бувчIаву. Депутатътурайн тапшур буллай ура чялишну гьуртту хьун дуллалисса мероприятиярттавух».
Сессиялий махъру лавхъунни мукунма ДР-лул Халкьуннал Мажлисрал председательнал хъиривчу Камил Давдиевлул, Дагъусттаннал бакIчиначIасса Хъунисриннал советрал председатель Ибрагьим Ибрагьимовлул, «Время Героев» программалул гьурттучи МахIаммад Валиховлул.
Яла цаппара депутатътуран дуллунни наградартту.
Сергей Меликовлул ДР-лул парламентрал депутат Имам Яраьлиевлун дуллунни «За милосердие и благодеяние» тIисса Дагъусттан Республикалул ХIурматрал лишан.
Муния махъ депутатътурал ххал бивгьунни «Дакьаврил судиятал битаврил хIакъираву» тIисса масъала. ДР-лул Верховный Судрал председатель Федор Щукиннул бувсунни цIуну битан хIадур бувминнал цIарду. ЦIуну къуллугъирттай бивтсса «дакьаврил судиятурал» хъа бунни лажин кIялану зун.
Депутатътурал кьамул дунни цаппара законнал проектру.
