МахIачкъалалив ва Каспийскалий Росгвардиялул управлениялул подразделениярттаву хьунни Къизлярдай ва Хасавюртуллал райондалийсса Первомайское шяраву оьсса бала хьуну 30 шин шаврин хас дурсса мероприятияртту.

Шикку гьуртту хьунни Аьрасатнал Виричу, Дагъусттаннал Мюхчаншиврул советрал секретарь МахIаммад Баачилов, Росгвариялул региондалул управлениялул хъунама, полковник Вадим Кузнецов, ванал хъиривчутал, хасъсса подразделениярттал командиртал ва зузалт, къуллугърал ветерантал.Тай иширттаву гьуртту хьусса МахIаммад Баачиловлул дакIнин дирчунни 1996-ку шинал январь зуруйсса оьсса бала ливксса кьинирду, бувсунни милицанал зузалтрал ва хасъсса подразделениялул аьралийтурал къучагъшиврия, багьана бакъасса инсантурал оьрмурду ххассал буллай, жанну дуллусса къуллугърал уртакьтурая.
«ЧIярусса шинну ларгунни тания шихуннай, амма тай иширттал къюву куклу хъанай дакъар, лялиллай дакъар. СОБР-ал ва ОМОН-далул чIявусса зузалтрал жанну дуллуссар та чIумал. Вай эбратну хьун аьркинссар ялун нанисса никиран, хаснува Росгвардиялул жагьилсса зузалтран ва аьралийтуран. Вай жунма мудан дакIний бикIантIиссар. Ттун ччива цIанасса зузалтралгу хIакьину жува кунма дакIнин бичлай къуллугърал бурж бартбигьлай жанну дуллусса зузалт, ччива миннал дуллай бивкIмур гихуннайгу лайкьну дачин дурну», – увкунни МахIаммад Баачиловлул.
Вадим Кузнецовлулгу кIицI лавгунни, присягалийн хаин къавхьуну, къуллугърал бурж бартбигьлай жанну дуллуми ялун нанисса никиран Ватан ххирашиврул эбратну хъанахъишиву.
Ихтилатру къуртал хьуну махъ тIутIив дирхьунни къуллугърал бурж бартбигьлай жанну дуллусса хасъсса подразделениярттал зузалтрансса гьайкалдануцI ва баян бунни миннал аьпалун минутрайсса пахъ багьаву.
ДакIнин бутан, 1996-ку ши­нал январь зурул 9-нний, кIюрххицIунмай, Салман Радуев бакIчисса, ярагъуннил алгу­сса 300 инсан ххявхссар Къизлярдайн. Миннал канийн лавсъссар шагьрулул азархана, шаназарунния ливчусса инсанталгу ширишилун бувгьуну. Хъиривмур кьини, ширишилун бувгьумигу хьхьичIун бавкьуну, урчIва автобусрай Чачаннал чулухунмай нанисса къачагътал Первомайское тIисса шяраваллил зумакъирагърай бацIан бувссар федерал гужирдал. Январь зурул 15-нний, хъунисри ва ясир бувсса цаппара милицанал зузалт къачагътурал аьщун бивзсса баяйхту, шяраваллийн гьужум бувссар. Ва данди бацIавриву аьмну 80 инсан жандалуцIа хьуссар. Миннавух — ихтиярду дуруччай органнал зузалт, аьралийтал, спецназрал кьюкьравуми ва укунмасса инсантал. 174 инсаннайн личIи-личIисса щавурду дирссар.

Андриана Аьбдуллаева