Январь зурул 24-нний МахIачкъалалив Октябрь революциялул каналданувун багьсса машиналува нину ва оьрчI ххассал буллалисса видео социал сетирдай хъинну машгьурну дия.

Мяйжаннугу, чувшиву ккаккан дунни ххассал бувминнал, кIюласса муххал турбалийх лавхъун, лултту бувккун нанисса машиналува таксистнал уллусса чIивитIу уккан унни. Ххассал буван ххявхминнавасса цаннал, щинавун агьарчангу тIий, яннагума лирккун дия цаятура та микIлачIру дусса кьини. ЧувшивручIа бишинсса цамур хIуччагу хьунни, ккавкми хIайран бувансса – цукун ххассал буванссарив анаварну пикри буваву. Мугьлат бакъа турбалийх лавхъун, пагьламантал кунма, машина турбалул лултту бувккун нанисса хIалатраву оьрчIайн хъап учаву. Цахъис чIал хьуссания, машина бивгьуну гихунмай най бакъарив. ТIааьн бивзунни ва иширая ххуймурнияр къаххуймур гьаз бан анавар буккайсса дунияллул СМИ-лулгу бусаву. Масалдаран, Британиянал «The Sun» тIисса изданиялул сюжет тикрал дунни Аьрасатнал Цалчинмур федерал каналданулгу. Британиянал журналистътурал дагъусттанлувтурайн «хIайран буванну кумаг бувсса вирттал» увкунни.

Шиккува кIицI лаганну, МахIачкъала шагьрулул мэр Жамбулат Салавовлул тапшур бувшиву укунсса ишру тикрал къахъанансса чаран ккаккан. Щупир Нурислам Рамазановлул бувсунни цува машина ссур бувну най къаивкIшиву, 40-50 километра ца ссятрай ритлай най ивкIшиву, ччех бивкIун багьшиву КОР-данувун. Ва цалчин хьусса иш бакъар. Машинартту КОР-данувун багьлай бур кIинттулгу, гъинттулгу, ччимур чIумалгу.
КОР МахIачкъалаллал, Каспийскаллал ва Избербашрал агьлу щинал дузал ­буллалисса каналли. Совет заманнай КОР-данул чIарав, чIяву зивурдайсса къатриния чуври, укунмасса лагь-максса къатта бувангума къадагъа диркIун дур. Утти ччиссаксса къатригу, заллухъру бусса клиникардугу хьуну бур, каналданул чIарахсса ххуллу хъиннува къума хьуну бур. Ми лекьан буллан къахьунссар, «хьумур хьуну хьулухух бавцIунни» учай тагьар дур. Амма, апатIругу, оьзрурдугу, нигь рутансса укунсса ишругу чIявуну хъанай бухьувкун, щинал марцIшивугу дуруччин, нигьачIавугу къадикIан, ялтту магъи къадиширча, тиха-шиха чапардурагу дурну, канал лакьин бучIияхха. Къатраха канал цурдарагу чIалайгума дакъар. Вара тагьарданий ядирхьуну ритангу къабучIир, къабучIишиву кIа цIана хьусса иширалгу исват бунни. ХIатта ххуйну ххассал хьусса иш бухьурчангума.
ПатIимат Рамазанова