ДР-лул Национал библиотекалуву вай гьантрай хьунни «Солдаты России – могучая сила» тIисса, Буттал кIанттул цIанийсса Хъун дяъвилий ва хасъсса аьралий операциялий Ватандалул ххуллий чувшиврий жанну дуллуминнан, хIакьинугу паччахIлугърал мурадру буручлачиминнан цIа кусса луттирал презентация.

Лу итабавкьуну бур Ккавкказуллал Чичултрал клубрал цачIуну. Ва сакин баврия бувсунни Ккавкказуллал Чичултрал клубравун бухлахисса шаэртурал дянив ца яла хьхьичIунсса ххуттайсса Миясат Муслимовал. Лу итабавкьуну бур Дагъусттаннал паччахIлугърал луттирду итабакьай идаралул ДР-лул Печатьрал ва информациялул агентствалул кабакьаврийну. Шивун багьну бур Москавлия­сса, Ухссавнил Ккавкказнавасса, Кьиблалул федерал округраясса чичултрал, шаэртурал, публицистътурал произведенияртту.
Луттирдаву бур хасъсса аьралий операциялий Ватандалул мурадру буруччаврил ххуллий чувшиврий жанну дуллусса кIия лаккучунаясса произведениярттугу: Хъусращиял шярава­сса, Чувшиврул ордендалул кавалер, чIавама сержант Алик Гъазиевлул аьпалун ва ванал ниттин, СахIилун, хас бувну Миясат Муслимовал чивчусса шеърирду ва вара шяраватусса, Зеленоморскалий ялапар хъанай ивкIсса, Чувшиврул ордендалул кавалер Симран Ванатиевлуя журналист Багьауттин Самадовлул чирчусса макьала. Мероприятиялул бусравсса хъамаличу ия Пермь шагьрулиясса шаэр, Аьралий училищалуву дарсру дихьлахьисса Валентин Юхта. Ваналгу ккаккан бунни цащала архIал къуллугъ буллай бивкIсса, хасъсса аьралий операциялий жанну кьурван дурсса кIия дагъусттанчунан – Мурад ХIасанбаговлун ва Муса Малачовлун хас бувну итабавкьусса лу.

Зулайхат Тахакьаева