Архмур Баргъбуккавал аьралий округрай къуллугъ буллай, хIакьину хасъсса аьралий операциялий талатисса жула лаккуоьрчIачIан ттигъанну дирунни СВО-лул Аьрасатнал цалчинсса Виричу НурмахIаммад ХIажимахIаммадовлул ниттил Сапижат Мазаевал кабакьаврийну ларсъсса беспилотник.
Аьралийтал дакIнийхтуну барчаллагьрай бур Сапижат Мазаевайн, аьралий мурадру биттур баврин бакъа чара бакъасса ттизаманнул ярагъ тIайла буккаврихлу.
«Жу мудангу хIадурну буссару цала жагьилсса жанну хIайп къакуну, бивкIулийн лажинну бавцIуну, паччахIлугърал мурадру буруччаврил ххуллий талатисса аьралийтуран кумаграл ка тIитIин. Ттунгу, на кунма, хасъсса аьралий операциялий Ватандалул ххуллий арсваврацIа цумур-цагу ниттингу гьарца аьскар цила арс куна чIалай уссар.
Дуаьлий буссару, ччясса мутталий СВО-лул ахиргу дуркIун, жула оьрчIру сагъ-саламатну ххувшаврищал зана хьуннав цала кулпатирттал ялун тIий. Бурувччуну лякъиннав цив Заннал!» – увкунни Сапижат Мазаевал.
