Ларгсса ххуллункьини, МахIачкъалалив генерал Оьмаровлул цIанийсса «Тор -Теаm» тIисса спортрал залдануву цIанихсса чемпионтурал Рамазан Рамазановлул ва Аьбдулкьадир Аьбдуллаевлул мастер-классру ккаккан бунни.

Ва даврил сиптачитурал, «Лакрал жагьилтурал ккуран» ДООО-рал вакилтурал бувсунни, оьрчIру ва жагьилтал спортрал чулинмай кIункIу бувансса, профессионалтурах вичIи дирхьуну, низам, цIуллу-цIакьсса оьрму язи бугьансса мурадрай дурсса даву душиву.
«Цинявнная къашайссар чемпионтал. Спортрахун машхул хьуминналгу, цума-цагу инсаннал кунма, гьанумур мурад бикIан аьркинссар, цува цукун хьхьичIун личирчангу, лавайсса даражалийн гьаз хьурчагу, инсансса инсанну личIаву. Спорт – цIуллу-цIакьшивручIансса ххуллур, спортрал инсан низамравун утлатиссар», – увкунни Рамазан Рамазановлул, бавтIцириннан маслихIатру буллай. Спортрал майданнив цала техника ххуй дансса опытрал хъирив бувкIсса оьрчIаща ва жагьилтураща чемпионтурахьхьун ччимур журалул суаллу булун хъанай бия. Хъамаллурал кьиматрайсса маслихIатру бунни, цIувххумунихьхьун балжисса жавабру дуллунни. Сакиншинначитурал бувсунни укунсса мастер-классру гихунмайгу буллантIишиву.

ПатIимат Рамазанова