Ххирасса дустал!
«Илчи» – щаллагу дунияллун Дагъусттаннай хъанахъимуния баян буву, Ла­ккуйсса цIусса хаварду баян буву, миллатрал тарихрая, культуралия дарсру дихьу, миллатрал кьатIаллищалсса дахIаврил ламу ва яла-яларив, миллатрал маз ябуллалимур.

Ми циняв бигарду лайкьну биттур буллай бур «Илчилул». Кказитрай цалва миллат дазу-зума дакъа ххира­сса ва гьунар бусса журналистал зий бур. Ярославрай Совет Союзрал кIийла Виричу АхIмад-Хан Султаннул гьайкал дихьлахьисса гьантрай буссия жущал авур ду­сса ва даву ххуйну кIулсса журналистал ПатIимат Рамазанова ва Имара Саидова. Хъинну ххуйсса репортажру дурккуна кказитрай, хIатта Ярославрал областьрал губернаторнал барчаллагьрал чагъаргума чивчуна редакциялийн.
Ххирасса дустал! Зу ххирану ва хIурматрай буру. Зу чичлачимур гъирарай ккалайгу бур. Зу буллалиссару бюхттулсса миллатрал тарих, мунил зу хъамагу къабитантIиссару! На дакI дарцIуну ура зу уттиния тинмайгу буккултрал хIурматран лайкьну зунтIишиврий. ДакIнийхтуну чIа тIий ура редакциялул зузалт­ран давурттаву тIайлабацIу, цIуллушиву ва хъиншивуртту.
Шяпи Оьмаров,
Ярославрал областьрай­сса Дагъусттаннал диаспоралул хъунама