Щалагу Аьрасатнаву нанисса «Елка желаний» акциялул лагрулий ЦIуссалакрал райондалул бакIчи МаматIи ХIамзатовлул мурадирайн биян бунни Шушиннал шяравасса чIиви художница, хасъсса аьралий операциялул гьурттучинал душ, 10 шинавусса Марьям Умариева. Мурадирал елкалийн лавхъсса открыткалий ванил чивчуну бия: «Цила дикIайкун суратру дихьлан лахьхьин ва дуниял кIул дан ччай бура.

Ттул хиял бур суратру дихьлансса планшетрая, аькьлу бусса гаджетирттая ва опытирттая!» Марьямлун пикри бур художница хьунсса ва элмулухун багьансса. Ванил открытка ликкан нясив хьунни райондалул бакIчинан.
– КIулшивурттах ва творчествалух гъира бусса оьрчIал хиял бартбигьин аьркинссар. Укунсса открыткартту ккалаккисса чIумал бувчIлай бур вай оьрчIал цIанирду бакъашиву, хияллачIансса цалчинсса шаттирду бушиву. Жува кумаг бан аьркинссар ми мурадирайн биян бан, – увкунни МаматIи ХIамзатовлул. Ванал командалул ччяни ляркъунни сурат дишайсса планшет, дирхьунни миннучIа кьалантирттал фломастердал ва пилчардал набордугу, физикалул ва химиялул опытру буллансса наборгу. Миннуйгу гьашиву къадурну, бахшишрачIа дирхьунни аькьлу бусса колонка «Алиса», чIиви душнища аудиолуттирдах вичIидихьлан ва маз итххяххан бан хьуншиврул.
Ккаккан дурсса кьини райондалул бакIчинал хъиривчу Арсен Гъазиев ва райондалул КIулшивуртту дулаврил управлениялул хъунмур Светлана Кудаева бувкIунни бахшишращал Умариевхъал кулпатрачIан. «Укунсса лахIзардал дакIнин бутлай бур жула даврил къайгъурду так ххуллурдацIун ва бюджетрацIун бавхIусса бакъашиву. ОьрчIал яру ххаришиврул пар тIутIи бавугу жула биялдарал иш бушиву. ЯлунчIилгу гьуртту хьунтIиссару «Хияллал елка» акциялуву», – увкунни райондалул бакIчинал.
МаматIи ХIамзатовлул бартбивгьунни ЦIуссачIурттащиял шяравасса Сакинат Темировалмур хиялгу. Ряхра шинавусса Сакинатлул «Хияллал елкалийн» лархъсса открыткалий чивчуну бия: «Ттун ччива ттула дустуращал тIуркIу тIунсса кухня, мукунна опытирттансса набор». Райондалул бакIчинал га цIана тапшур бунни чIиви Сакинатлун бахшиш хIадур дан.
Дустуращал чяй хIачIлансса къатта-кухня, нахIу-нацIулул кьуцуру ва экспериментирттансса набор душничIан диян дунни райондалул бакIчинал хъиривчу Арсен Гъазиевлул ва «Цалчинминнал Суккушиннарал» кIанттул отделениялул председатель Жамилат Мусиевал.
Сакинатлул чIа кусса бахшишраясса ххаришиврул дазу-зума дакъая. Цинна дуркIсса нахIу-нацIурду ванил щала кулпатрайх дарчIунни. Душнил нитти-буттал дакIнийхтуну барчаллагь увкунни райондалул бакIчинахь. «Укунсса ххарисса лахIзарду оьрмулухун дакIний личIайссар. Утти Сакинат вихну бикIантIиссар хияллай бухьурча, ми бартлагантIишиврийн», – увкунни вайннал.
– Гьарица оьрчI лайкьссар караматсса бахшишран, хаснува ЦIусса шинал. ОьрчIал мурадру бартбигьаву – му так хъинсса аьдат дакъар, му жула жаваблувшиннагур. ОьрчIал яру ххаришиврул пар тIутIи бавунияр ххуйсса награда ци дуссар, – тIий ур райондалул бакIчи.
Андриана Аьбдуллаева