Декабрь зурул ахирданий Дагъусттаннал премьер-министр Аьбдулмуслим Аьбдулмуслимовлул паччахIлугърал наградартту дуллалисса шадлугърай Поэзиялул театрданул директорнал хъиривчу, Дагъусттаннал Чичултрал союзрал хъунаманал хъиривчу Супиян Оьмаровлун Расул ХIамзатовлул цIанийсса медаль дуллунни.

Культуралул ва литературалул дунияллий бивхьусса чIярусса шиннардийсса захIматрахлу.
«Гьашину 10 шинни Поэзиялул театр хIасул бувну, ва театрдания чIявуну чичлан, буслан икIайссия Расул ХIамзатов. Ванал цIанийсса медаль ттун бусравссар, лахъсса кьиматри тIий ура ттула даврин бивщусса. Уттигъанну Москавлив хьусса Аьрасатнал чичултрал съездрай кIицI лавгунни чичултгу творчествалийну Ххувшаву гьан дуллай бушиву. 1999 шиналсса аьралий ищирттал гьурттучи хIисаврайгу на оьвтIий ура уртакьтурайн. СВО-лий Вирттавран литературалуву лайкьсса кьимат бищлан», – тIий ур цува Супиян.
ДакIнийхтуну барча тIий хъунасса шаэрнал цIанийсса медаль, Супияннун чIа тIий буру цIу-цIусса хьхьичIуннайшивуртту, оьрмулуву ва дуллалимуниву тIайлабацIу.
ПатIимат Рамазанова