ЦIусса шинал дайдихьулий, январь зурул 9-нний, Ккурккуллал шяраву хъунмасса бала хьунни. Токрал ххаллал замыкание сававну цIу ларчIун, ччурччунни МахIмудлул (аьпа биву) ва Майсаратлул хъунмасса кулпат ялапар хъанахъисса къатри.
Машина къалагайсса кIанттурдай, шяраваллил лахъний дирхьусса къатри, инсантурахьхьун лещан дансса мутта къабуллуну, гужсса цIарал ламарал ца лахIзалий кIалашрайн дуккан дунни. ТалихIиннаран, райондалул ва Лаващату бувкIсса цIу лещан дай къуллугърал зузалтрал чIаххуврайсса къатрайн дагьан къариртунни. КьурукIинттул кулпат кьатIув ливчIунни.
Амма дакI ххари дунни Ккурккуллал жяматрал, циняв ца хьуну, ца лахIзалий кулпатран бувсса ххуйсса кумаграл. Пожар хьуну ца-кIира ссятрал дянив Жанна АькIиевал каялувшиндаралусса Ккурккуллал ихIсандалул ккурандалул рартIунни 400 азарда къуруш.
ХIакьинусса кьини Ккурккуллал жяматрая сакин хьусса ккурандалул, шивун бухлахиминнал дустал ва даврил уртакьталгу, миннавух личIи-личIисса миллатирттал вакилталгу хIала бувххун, кулпатран кумагран рартIунни 1 миллион ва 310 азарда къуруш. Вай ца-кIива гьантлул дянив рартIсса арцур. Кумагру уттигу найнма буссар.
Шиккува кIицI лаган, «Ккурккул» тIисса ихIсандалул группа сакин бувну февраль зуруй кIира шин хьунтIиссар. Уттинингу вайннал цикссагу кумагру бувссар захIматсса тагьарданувун багьсса, къашавайсса инсантуран, цимилагу гьан бувссар кумаг Палестиннал халкьуннан, бувссар кумаг «Жизнь без слез» тIисса ДРООПИ-лун (Дагестанская региональная общественная организация помощи инвалидам) мушакъатсса оьрчIру буцлай, биян буллансса «Газель» ласун.
Къатри ччурччуминнан кумагран 300 азарда къуруш рартIунни Тамирлан ХIабибуллаевлул каялувшиндаралусса «Гъази-Гъумучи» ихIсандалул фондралгу.
Цала чулуха ххуйсса кумагру Лакрал райондалул бунни хьхьичIссагу, цIанассагу бакIчитал Юсуп МахIаммадовлул ва Зураб Куччаевлул.
Барчаллагьри ва захIматсса тагьарданий ливчIсса кулпатрал чIарав бавцIусса цинявннан.
Жул шяраву хьусса ва пашмансса иширал цIунилва-цIунил тасттикь бунни жула халкьуннал, ккурккуллал, лакрал, дагъусттанлувтурал, рахIму-цIими бушиву, инсаншиву, чувшиву, чумартшиву.
Я Аллагь, бувмур АллагьначIа кьамулну лякъиннав, цадакьа хьуннав, бала-апатIрал хьхьичIун багьаннав. Гьарицагу инсан кIул бакъа балаллуя урувччуну лякъиннав, ца къахьунмур хьусса чIумал чIарав ацIансса цIимилул чув чан къахьуннав.
Андриана Аьбдуллаева
