Декабрь зурул ахирданий Москавливсса Дагъусттаннал культуралул центрданул вакилтал ва Мариян Илиясовал цIанийсса «Дараччи» фондрал душру бивунни машгьурсса композитор, РСФСР-данул халкьуннал артист, Аьрасатнал ХIукуматрал премиялул лауреат Ширвани Чаллаевлул юбилей барча дуван ваначIан шаппай. Хъамаллурал барча унни хъунасса композитор, дунияллул музыкалул майданнив ца яргмур ва цIакьмур кIану бугьаврихлу, гьунарданухлу, чIярусса шиннардийсса захIматрахлу барчаллагь увкунни. Дуллунни юбилярнан «Дагъусттан» МЦК-лул ва «Дараччилул» чулухасса бахшишгу. Центрданул президент, Аьралий элмурдал академиялул академик Арсен ХIусайновлул Ширвани Чаллаевлун дуллунни «За верность Дагестану» тIисса медаль. Ванал бувсунни цува Ширвани Рамазановичлущал чIярусса шиннардий дусшиву дуну ушиву, ва цувагу Дагъусттаннал диаспоралул давурттавух чялишну хIала уххайсса ивкIшиву. Центрданул вице-президент, профессор Астемир Шайхаьлиевлул кIицI лавгунни жура-журасса жанрдай хIасул бувсса ванал произведениярттава аьлтта чIалай бушиву ва цукун бюхттулсса гьунарданул заллу уссарив, ванал ляличIишиву, музыкалул кьуват ва буттал кIанттухсса куртIсса ччаву.
«Жул дакIру ххари хьунни, Ширвани Рамазанович жува бучIаврия ххари хьуну ккавккун. Ванал кулпат Ирина Евгеньевна барчаллагьрай бия, юбилей хъамакъариртун, ва барча увцириннайнгу, бахшиширттащал ва ссайгъатирттащал шаппай бувкIун барча увцириннайнгу. Ширвани Рамазановичлун цува Дагъусттанная яувцун ливчIсса асар къабагьан, ччя-ччяни булухьхьияра тIий бия. Икьрал дуварду гъинттул дачалий хьунабакьин, ванал творчествалул кьимат лахъсса, ванал чIарав щябикIан хьурдай тIисса цайми инсантал лагма лавгун», – увкунни Басират Билаловал.
Бусан ливчIунни хьхьичIва «Дагъусттан» МЦК-лул Ширвани Чаллаев ккаккан увну ивкIшиву паччахIлугърал наградалун – «Дагъусттаннал ХIурматрал ордендалун» ва му награда уттигъанну республикалул культуралул министр Зарема Буттаева ва ХIукуматрал хъунаманал хъиривчу Муслим Телякавов хIаласса хъамаллурал, вава куццуй, Ширвани ЧаллаевлучIан шаппай бувкIун, хIурматрай дуллушиву.
ПатIимат Рамазанова
