1991 шинал январьданул 8-нний Качар ХIусайнаева бакIчину «Илчилул» редакциялул итабавкьуссар кказитрал цалчинмур номер.

«Илчи» утта бувккун 35 шин бартлагаврищал лакрал миллатгу, кказитрал уртакьталгу, буккултгу, зузалтгу дакIнийхтуну барча бан ччай бур.
ЛяличIину барчаллагь учин ччай бур «Илчилул» буккултрахь. Ва хъунмурчIин зул байранни. Зу жул чIарав буссаксса къалещантIиссар ванияр 109 шинал хьхьичI Гьарун Саэдовлул лавхъун бивкIсса «Илчилул» чирахъ.
«Илчи»- му жула уттарашивур, миллат бушиврул барашинни, лакрал халкьуннал дагьанир.
Бачияра, «Илчи» цила миллатрал иширттал чIарав бацIлацIисса кунма, ванил чIаравгу бацIланнуча, му гьарцагу лаккучунал ужагърайн букIлакIи баннуча!
Ва иширацIун даркьуну чIалай дур 16 шинал мутталий «Илчилул» корреспондентну зий ивкIсса Чанкура КьурбанмахIаммадовлул назмугу.
***
«Илчи» най бур чай бурттий,
Хьхьури цIакьну дургьуну,
Лахъисса ххуллул манзил
Юргълий битан кьаст дуну.
Чумартсса чувнал кунма,
Кьяпа хъилий бивхьуну.

ЛяличIину яргсса бур
«Илчи» чирахърал чани,
Му чани бур миллатрал
Мяърипатрал дагьани.
«Илчилул» чаннал тIинтту
Дияй аьламравунгу,
Аьламатру мяш тIисса
Архсса билаятрайнгу.

Барча, «Илчий», юбилей,
Лакрал миллатрал балай,
Дунияллул мукьвагу
МурцIний лакран бусравсса,
Бюхъайссар вища бикIан
Абадлий пахру буллай,
Буну тIий лагма лавгми
Вил цIа бюхттул дуллайсса.

Буккултрал ккал хъун хьуннав,
Уртакьтал чан къахьуннав,
Юргъа бидавлул бущи
ТачIав хьхьара къахьуннав.
Ина лакрал миллатрал
Чирахънува личIаннав,
Вил бюхъулул ардарав
ХъункIултIутIив хъя тIуннав.