Даниял Магьдиев

Щукру

Щукру цIуницIа интту
Дараччи хъяучайсса,
Къурнил заллу ккурмузи
Ттигу тIутIайх бичайсса.

ТтурчIиял кьанну цIунил
Циняв щюлли лагайсса,
Маршри хъункIултIутIавун
Цинявппа бахьлагайсса.

Булбул вацIлул мурхьирай
Балай тIий байбишайсса,
Щарнил лагма щаращив
Макьан дуцлай бачайсса.

Щарнил къума кIичIиртту
Шанава чантI учайсса,
Уттасса лахъи ккурчIа,
Аргъ дуркIун, тяхъа шайсса.

Ччаврил шанан къаивтнал
Хьхьурду ккурчIав дичайсса,
Хъуна Зайдул мукъурттил
Щарних ччаву хъун дайсса.

Шану ххивусса нагу,
Асардал кIункIу увну,
Жагьилтурал кьюкьлуву
Гъургъу тIий щяикIайсса…

Цуманал ци тIурчагу,
Щукру ва оьрму ххуйсса,
КIинтнил аькъин увмагу
Интнил гъили увайсса.

Щукру, шинну ларгнугу,
ОьрчIшиву ттун дакIнийсса.
ОьрчIру хIазрай ккавккукун,
Ттул дакIнил пиш учайсса.

Щукру дакIний инт дунал
Оьрму мудан тяхъасса,
БакI кIяла хьуну махъгу
Щукру дакI жагьилнасса.

Миннатри

Агарда чIавасса, оьрчIнийсса чIумал
На дурну духьурча къалайкьсса къеллу,
Миннатри дакIнийхту ттул зухь цIанакул,
ОьрчIал оьрчIи тIуллал ялтту бучIира!

Нажагьлий, жагьилний, кIири ивчуну,
ДакIнивун кьутIинсса махъ увкухьурчан,
Тавакъюри ттул зухь дакIнийхтунусса,
На багъишла итан хIарачат бара.

Пикри къабув даву утти на дарчан,
Миннатри, багьайсса аьй ттуй дувара,
КIяла хьусса бакIрал хIурмат къабувну,
КIянкьасса танмихI ттун лагманал бара.

Мяш шара

Иш багьний дуснащал хIан хIачIан
кIулнан –
Мугу ца талихIри уква буллусса.
Увччу хьуну щалва оьрму бутаву –
Мугу куклушивур дазу дакъасса.

Аьркинний ссупралух щяикIан шаву –
Мугу инсаншивур мукIру хьун ччинан.
ЧIумуй ссупралуха изан кIулшиву —
Мугу ца аькьлури, хIисав дайманан.

ХIан дусну лякъайссар чIяру къадайнан,
Лавмартну лякъайссар аькьлу бакъанан.
ХIанттил кумаграйну бакIуйн лавхъссагу
Дунияллий ттинин паччахI къаувкссар.

Цанма зарал бусса чIалан диркIукун,
ХIанттия арх шаву дакI кьянкьашивур.
КъахIачIанна кусса махъ бацIан баву –
Му марцIсса чувшиврул хIакьсса барари.

Мяш шара, иш багьний, хIан хIачIан
кIулнай,
Мудан хъинсса пикри дакIний буманай,
Хъинмур, мюнпат бумур цала чIаравнан,
СсайчIав мяш къавхьуну, чIа тIутIиманай.

КIилийну мяш шара хIан кьариртманай,
Инсан хъун уванну ихтилат байнай.
ХIарчIун, гьалак увкма, ках куну хIаллих,
Паракьат увансса махъ учин кIулнай.

Чув дур вил лажин?

Вил шиннардий, жагьил, на мяшну ура,
Канийсса чичрулийн ссибизлай ура:
ДукъарчIайсса лажин, ник тIартIсса хIажак,
Ина ци тIиссарав бувчIлай акъара.
Виричу цумарив, угъраш цумарив
ЛичIи ан захIматсса чIун тти дуркIун дур.
ТIайламур цумурдив, щялмахъ цумурдив
Кув чIумал личIи бан бюхълайгу бакъар.
Ци ххуллийх, чунайра ина нанисса,
ДурчIин дан шайссарив оьрмулул мяъна?
Зунттал бюхттулшиву хъамадиртманан,
Луглай, лякъайссарив мина дан кIану?

Га бакъарив талихI

Кув чанардай бигьлай, кув кканккай
бигьлай,
КIинтния хIаз ласлай, ччеххуй бур оьрчIру.
Хъуними кьарчI бикIан бувайсса дяркъу
Гай бур ххаришиврул хIисав къахъанай.

Га бакъарив талихI оьрчIан буллусса,
Оьмуния цичIав хавар бакъасса.
Гай дакъарив шадсса оьрмулул шинну,
Ларгун махъ цукунчIав зана къашайсса.

КIинтнил кьини къуртал хьушиву буслай,
ХIаллих цIан лахъния аьрщарайн дагьлай,
Гьарзат хъамадиртсса оьрчIащал архIал
Дякъия, ччеххуя хIаз ласлай ура.

Иттав загьир хьунни мукьал кIива кIунтI,
Ттул дяркъусса чIаврдайх ккуру лавгунни.
ЦIунил жагьил хьусса ттулва хияллу,
Ттулламур оьрчIшиву ччеххуй ххал хьунни.

* * *

Инт гъан хъанай душиву
Гьаварал буслай бури,
Бюхттулсса зунттал мицIру
ХIаллих цIан лаглай бури.

Марщай интнил вакилтал –
Дараччив хъя учайхту,
Дуснащал къурув гьанна,
Цалчинми тIутIив датIин.

Ца кацI на интнил тIутIал
Шаппа ниттин булунна.
Ттула учительницан
Гамур кацI лавсун гьанна.

Бухьхьияра жучIан

Бухьхьира жучIан Ккурклив,
Жу бизарсса бакъару,
Бивзун лавай, дугьанну
Хъинсса дустурал кару.

Буттал буттахъал бувсса
Ккурккуллал лахъи ккурчIав
Хъамал лахъан къаччисса
КъалякъинтIиссар цучIав.

Дус уван ччисса чувнан
ТIайлабацIу хIадурссар:
Шяравусса жагьилтал
Цаннаяр ца аьчухссар.

Вай аьчухсса къабикIан,
Къатри лагьсса дунурив,
Юхсса илкинсса багъру
Бургъил кьакьан бувнурив?

Юх, ми ишру бакъассар:
МурчIи къавхьуссар яру,
ЧIатIа дугьан, щин дуцин,
Сагъну дуссар жул кару.

Бюхъу бунал сий дуллай,
Лехлай буссар балайрду,
Жу балай тIий буссаксса
Сагъссар Щаза ва Зайду!

Бухьхьира жул шяравун,
Инсаншиврул сий гьаз дан,
«Алжаннул ккурккай Ккурккул»
Цукунсса бурив ккаккан.

Ссутнил ттурлу

Муруллул хъачI-бакIай пахъ дагьсса ттурлу
Бургъил тIинтту щуннин сукку къархьуна.
Дяркъусса хъатругу хъирив кьадиртун,
Яла хIурхIацIакул ссавнийн гьаз хьуна.

Мурчахьхьун дуллуну кIяла хъаругу,
ГьантIиссар ттурлугу, бири-бат хьуну,
Ччуччавайсса уртту силул ччуччин дан
ЛичIантIиссар ххяллуй дяркъу хъатругу.

ЧитIрахь

Ахъал ранг, зунттурду, лагмара гьарзат
ХIисаврагу дакъа даххана хьунни,
Ссавнил балайчитал, ттул дустал читIри,
Ттун хавар бакъана ливхъун лавгунни.

КIири билаятрайн, кIи къадучIайнийн
Зу левххун гьанссару, бургъийн хъита тIий,
Цимивагу зунтту, арду-майданну
Кьабитанссар зу махъ, барчаллагь куну.

Жул ялун ссут най дур, кIигу дучIанссар,
Амма зуй тачIавгу на къамяшссара:
Инт цирив ци кIулссар кIи къаккаркманан,
Балайгу бачIвассар пикри бакъанал…

ХъачIраххуллу

Архния ургайхту, итталун багьлай,
КIюласса ххуллу бур зунттуйх бивхьуну,
Жагь баклай бакIахун, жагь тIайла хъанай,
ДайлитIу зунттащал дур хIала духлай.

Лагай, ца-ца бизлай, бизар лиххан бан,
Та ххуллийх оьрмулул угьара хьума,
Лечай мюрщи оьрчIру, цанма бялахъан,
Тяхъану вечI-вечI тIий, лелуххант кунма.

Цимигу лавгхьунссар хьхьичIвагу инсан
Та кIюласса ххуллийх цала аьрххилий,
ЦикIулли барзунттахь ци тIий ивкIссарив,
Жапасса аьрххигу цукун багьссарив?

Нагу ссапар бара, чIун дирияйхту,
ХъачIраха уруган зунттах ва ахъах.
Неххардих вичIилий, тIутIах ялугьий,
Лавгцири оьрмурдал дакI дуцIин дуван.