Рустамлул арс Шамил Рамазанов Дагъусттаннал шяраваллил хозяйствалул ва бакIлахърулул министрну итаврил хIакъиравусса хавар ччяни ппив хьуна жула республикалийх. Му бувчIлачIисса зат бур: жула улклул чIявуми халкь шяраваллил хозяйствалуха, ризкьилуха зузисса бур. Мунияту миннал хъуннасса къулагъас дуллайгу бур ва ца яла агьамминнувасса министерствалул каялувчину итлатисса инсаннах.

Идаралул цIусса каялувчи ур жула кIанттул инсан. Ва министрну итавриясса хавар бавну жу хъинну ххари хьуру.
Шамил Рамазанов 2018–2025 шиннардий зий ивкIссар Ккуллал райондалул бакIчину, ва шикку зузиссаксса хIаллай жу мукIру хьуру цалва увкусса махъгу бацIан байсса, дуллалимургу бакIуйн дуккан дайсса каялувчи ушиврийн.
Шамиллул тухумрал мархри цIакьсса бур. Ванал ­бу­ттал ппу ия Совет заманнай Дагъусттаннайгу, щала билаятрайгу цIа дурксса инсан. Асадуллагьлул арс ХIасан Рамазанов чIярусса шиннардий гьуртту шайссия Москавлив ВДНХ-лий, чIярусса шиннардий ХIасан зий ивкIссар республикалул яла хъуниминнувасса цану хъанахъисса Гьарун Саэдовлул цIанийсса Ккуллал колхозрал председательну. Ва ия шяраваллил хозяйствалул элмурдал кандидат, ва гьурттуну буккан ­бувссар «Дагестанская горная» тIисса яттил гьанна. Колхозрал давурттаву хьун дур­сса хьхьичIуннайшивурттахлу кIийлла дуллуссар «Знак Почета» орден, колхозран цимилагу буллуссар «Занази ЯтIул ттугъ», колхозрал цIа лархъун диркIссар ВДНХ-лул ХIурматрал улттуй.
Укун цIа дурксса ризкьичинал кулпатраву хъуна хьуссар республикалул шяраваллил хозяйствалул цIанасса министр, ваналгу дурурччуссар шяраваллил хозяйствалул элмурдал кандидатшиврул диссертация.
Шамил Рамазановлул райондалул бакIчину зий ивкIсса шиннардий ккаккан бунни цува ушиву даврил хIал кIулсса, бажар бусса каялувчи. Райондалул жямат ванайн барчаллагьрай бур социал иширттаву, экономика лядуккан давриву хьун дурсса хьхьичIуннайшивурттахлу.
Райондалул администрациялул бакIчинал къуллугърай авцIукун, ванал Щуну-зунттуя Ваччиял шяравунгу, цаппара цайми шяраваллавунгу дурцуна марцIсса хIачIайсса щин. ­Ванал гьануцIакул ­бакьин бувна 12 школа, миннуву токрайсса гъилишивугу дузал дурну.
Райондалул бакIчинал сипталийну циняв шяраваллал ххуллурдал нигьачIаву дусса кIанттурдай дайгьузаннурду дуруна, чIявуми ххуллурдайх бавкьуна асфальт. Тамансса дахханашивуртту хьун дуруна райондалул хъуншяраву Ваччав. Цувагу спортсменгу ухьувкун, Шамил хъуннасса къулагъас дуллай ия райондалул спортрал ва физкультуралул иширттах. Ванал кабакьу бувну, Ккуллал шяраву бувссар чIивисса стадион.Рамазановлул райондалий дурсса давурттал сияхI хъуннасса дур, ттигу цимигу кIицI дуван хьунссия. Инсантал барчаллагьрай бур Шамил Рамазановлуйн ва чIа тIий бур цIусса къуллугърайгу хьхьичIуннайшивуртту.

МахIмуд Аьлилов