Дарбантуллал яла ххуймур, ляличIимур кIанттул сурат – Нарын-Къала – Да­гъусттаннал БакIчи Рамазан АьбдуллатIиповлун ччай бур цIуну итадакьлакьисса 2000 къурушрал чагъарданул арцул лажиндарай рирщуну.

Республикалул каялувчинал цалчинминнавух чIу буллуну бур Центробанкирал цIуххаву дуллалисса, цIуну 2017 шинал дуккан дуллалисса 200 ва 2000 къурушрал цIусса арцуй цумур сурат дирхьуну ччива, тIисса суалданухьхьун­сса жавабран хасну. «Эльвира Сахипзадовнал (Эльвира Набиуллинал) баян бувсса чIурду булаву дайдирхьуну махъ, на ттулва чIу булав жулва Дарбантуллал Къалалухлу», — увкунни ТАСС-рахь АьбдуллатIиповлул. [pullquote]ЧIурду булара цинявннал Дарбант шагьрулухлу ва сайтрай – http://твоя-россия.рф
[/pullquote]
Дагъусттаннал БакIчинал бувсунни, ганал пикрилий, цIусса чагъарданул 2000 къурушрал арцуй аьвзалзаманнул Дарбантуллал яла язимур суратраяр ххуйсса шакил лякъин захIмат хьуншиву.
Дарбант ккалли буллай бур дунияллул аьвзалзаманнул шагьрурдавасса цаннин ва Аьрасатнал яла аьвзалзаманнулмур шагьрулун. Ва хъанахъиссар античный чIумул бувагу ца шагьру, цуппагу цила гьану бивзсса кIанай яхьусса. 2015 шинал сентябрьданий Дарбантуллал дур­ссар 2000 шин шаврил шадлугъру. Ши­кку цалчин гьану бивзун бивкIссар ччясса чарвитул заманнай – жула эралиннийн­сса IV азарда шинал ахирданий. Аьрасатнал Банкирал хIакьину тIиртIуну дур хасъсса сайт – http://твоя-россия.рф», тикку ччиманаща бюхълай бур язи дугьан цIусса 200 ва 2000 къурушрал ча­гъарданул арцуй дикIансса цIусса шакил. ЦIусса арцу дуккантIиссар 2017 шинал ахирданий. ЦБ-рал личIи бантIиссар ххув хьуми чIурду булаврил хIасиллайн чул бивщуну.
ЧIурду булара цинявннал Дарбант шагьрулухлу.
ХIадур бувссар ХI. Аьдиловлул