Москавлив даврил аьрххилий лавгун ивкIсса Дагъусттаннал БакIчи Рамазан АьбдуллатIипов хьунаавкьунни Аьрасатнал Бусурманнал рувхIанийсса управлениялул Председатель, Аьрасатнал Муфтийтурал советрал Председатель, муфтий щайх Равиль Гайнуттиннущал.
АьФ-лул Бусурманнал рувхIанийсса управлениялул къатраву мубараксса Рамадан зуруй хьусса хьунабакьаврий ххал бигьлай бия жагьилсса никирал дуккаврил ва тарбиялул масъалартту.
Равиль Гайнуттиннул пикрилий, жагьилтурал ласун аьркинссар диндалул кIулшивунияр ххишала дуниявийссагу кIулшиву. Ми мукунма элмулухунгу багьан аьркинссар. Ганал бувсмунийн бувну, так гьашину исламрал институт къуртал бувсса 3 жагьил увххун ур аспирантуралувун, 7-ннал бувккуну бур магистратура.
Рамазан АьбдуллатIиповлул мукъурттийн бувну, динчинан ххуйну кIулну бикIан аьркинссар жяматраву хъанахъимур, мунил ялун бучIанмур. Республикалул каялувчинангу кIулну бикIан аьркинссар цукун ялапар хъанай буссарив дин дуллалисса уммат, цукунсса масъалартту щаллу буллан аьркинссарив диндалул ишккаккултрал. Жунма аьркинссар цачIу талан аьвамшиврущал ва буруччин жулва жагьилтал. Му бутIуву Аьрасатнал Бусурманнал рувхIанийсса управлениялул тамансса даву дуллай бур.
Хьунабакьаврий мукунма ххал бивгьунни террорчишиврущал ва экстремистшиврущал талатаву дачин даврил масъалартту.
Яла Равиль Гайнуттиннул Дагъусттаннал БакIчинан Кьуръан пишкаш бунни.
«Дагестанская правдалия»
Таржума бувссар
ХI. Аьдиловлул
