МУРАДОВ ИБАДУЛЛАГЬ АГЪАЛ АРС

Ттигъанну, оьрмулул 94 шинаву, аьпалул хьунни захIматрал ветеран, Хъанардал шяравасса Мурадов Ибадуллагь Агъал арс.
Увну ур Ибадуллагь майрал 7-нний 1931-ку шинал Хъанардал шяраву Агъал ва Удил кулпатраву кIилчинма арсну. Вайннал дянив хьуну ивкIсса ряха арснава ва ливчIун уссия, махъми ахиратравун лавгун.
Ибадуллагьлун 10 шин дусса чIумал, байбивхьуну бур Буттал кIанттул цIанийсса Хъунмасса дяъви. Га чIумул цайми оьрчIалмур кунна, дяъвилул захIматсса шиннардийн тIайла дарцIусса ваналмур оьрчIшивугу къабигьасса диркIун дур.
ИчIува ниттин, хIухчуну зузисса буттан кумаг буллай, цайми оьрчIавух колхозравугу цащара шаймур дуллай, оьрмулун лавхьхьуну къуццу тIий ивкIун ур ва.
Ибадуллагь хьхьичIва ялапар хъанай ивкIун ур ЦIуссалаккуй, яла – Къизилюртлив. 1977-ку шинал цалва кулпат ХIалиматлущал ивзун Каспийск шагьрулийн, тикку зий ивкIун ур «Дагдизель» заводрай ва цайми идарарттай.
Ва ия къалайчи, слесарь, 5-мур разрядрал сантехник, «Коммунист захIматрал ударник». Лайкь хьуну ия чIярусса медаллан ва цаймигу наградарттан. ВаначIан билаятрал бакIчи В. Путиннул цIаниясса чагъарду бучIайва Ххувшаврил байрандалийн.
Кулпат аьпалул хьуну махъ Ибадуллагь, цала уссурваврачIан гъанну икIан, махъунай Къизилюртлив ивзун уссия.
Ибадуллагь икIайва халкьуннал медициналуву чIявусса затру кIулсса, цаха цувагу урувгун, цайминнангу маслихIатру буллалисса, дакIнил хъинсса, цаманан кумаг буван ччисса.
Ибадуллагь аьпалул шаврил жижара буллай буру уссил щарнихь Ххадижатлухь, уссил арсурваврахь Заурдухь ва Аьбдул Мурадовлухь, махъсса цинявппагу гъан-маччаминнахь. Имандалийсса бивкIу хьуннав. Махъминнал оьрмурду лахъи баннав, агьулданий ххари-хъиншивуртту чIяру дуваннав, бихьу-барачат ххи хьуннав, ванал оьрмулувун ивну, оьрмулия щаливххун акъа цучIав ахиратравун къагьаннав.
Хъанардал жямат