Инишиял шяраваллил жямат Ватан дуруччин аьркинсса чIумал тачIавгу чулий бавцIуну къабивкIссар. ЦIанасса чIумалгу, Киеврал чулухасса геноцидрая – зулму-къиялия инсантал буруччаву мурадрай байбивхьусса хасъсса аьралий операциялий гьуртту хьунни шяравасса шама жагьил.
Минкаиллул арс Назар Сулайманов увну ур 1991-ку шинал учительтурал кулпатраву. 2022-ку шинал сентябрьданул 22-нний Аьрасатнал аьралуннаву къуллугъ буллан мобилизациялул увну ур. 2022-ку шинал сентябрь зурул 28-нния 2023-ку шинал ноябрь зуруйн бияннин самоходный гаубицалул ярагъуннил командирну ивкIун ур. Мунияр махъ цIанасса чIумуйнин ва ур управлениялул взводрал связьрал отделениялул командирну. Экипажрал составраву ва гьуртту хьуну ур 2023-ку шинал июнь зурул 4-нний дайдирхьусса Запорожскаллал направлениялий неонацистътурайн гьужум бувсса талатавурттаву. Лайкь хьуну ур Чувшиврул ордендалун.
2025-ку шинал Назардун дуллуну дур «За добросовестное и эффективное выполнение боевых задач» грамота. Дулун ккаккан дурну дур 2-мур даражалул «За храбрость» медаль.
Альбертлул арс Оьмар Амиров увну ур 2000-ку шинал. 2023-ку шинал июль зурул 23-нний контрактгу чирчуну, Ватандалул мурадру буруччин лавгун ур. Гранатометный отделениялул операторнал наводчик, чIивима сержант Амиров гьарица кьини, оьрмулун нигьачIаву дусса шартIирдай, минометирттал ва ракетарттал цIараву подразделениярттал дахIаву дузал дуллай ивкIун ур. 2023-ку шинал сентябрь зуруй чувшиврухлу, лавайсса даражалул пишакаршиврухлу ва оьрмулун нигьачIаву дусса шартIирдай къуллугърал бурж дакI марцIну бартбигьлай тIий, лайкь хьуну ур «За храбрость» медальданун. Ихтилатрайсса чIумал Оьмар буслай ия, цува рязину контрактгу чирчуну, аьралуннаву къуллугъ бан лавгшиву, цанма бувчIлай бивкIшиву хьхьичI ххуттай авцIуну талан багьантIишиву.
– Къуллугъ бан нанисса оьрчIахь ци учивияв? – цIувххукун, Оьмардул увкуна: «Аьрасат – хъунмасса, гуж бусса билаятри. Мукунмар ттигу бикIантIисса, Ватан дуруччин хIадурсса хIакьсса чиваркI, кьянкьасса аьралийтал буссаксса. Мунияту ттула аьралий дустал хьун наниминнахь учивияв, бачияра цачIу жула билаятрал гуж-цIакь хъиннува хъун буллан».
ЦIанасса чIумал Оьмар Амиров хасъсса аьралий операциялий ятIатIар бакъа акъа хьушиврун ккаллину ур.
МахIадлул арс Анзор Амиров увну ур 1972-ку шинал сентябрьданул 3-нний. 2025-ку шинал март зурул 2-нний контрактгу чирчуну, хасъсса аьралий операциялий гьуртту хьун лавгун ур. Ва къуллугъ буллай ивкIун ур сухопутный аьралуннал мотострелковый взводраву. ХьхьичI ххуттай авцIуну, командованиялул бигарду бартбигьлай, чувшиврий жан дуллуну дур. 2025-ку шинал ноябрь зурул 4-нний увччуну ур Лакрал райондалий Инишиял шяраву.
Му бакъассагу, Инишиял жяматрал чялишсса гьурттушинна дуллай буссар хасъсса аьралий операциялий хьхьичI ххуттай бавцIуну, Ватандалул мурадру буручлачисса аьралийтуран гуманитар кумаг гьан бавриву.
2025-ку шинал 291-мур мотострелковый полкрал командованиялул чулуха Инишиял жяматрайн бувкIунни Барчаллагьрал чагъар.
«Украиннал неонацистътал ва бандеровцы бат баврил цIаний зу буллалисса кумагран багьа бищун къашайссар. Зул кумаграйну жуща ххишала дан бюхълай бур жула аьралий потенциал ва анаварну бартбигьин бюхълай бур аьралий бигарду. Яла-яларив, гъан дан ххувшаву.
КIицI бан ччива мукунма, хасъсса операциялийсса аьралийтуран личIину цала-цала чулухасса кумагру тIайла бувкшиву шяраллил цаппара инсантуралгу.
Барчаллагьрал чагъарду бувкIунни Курскаллал областьрал жяматран гуманитар кумаг бавриву чялишсса гьурттушинна дурсса цаппара инсантуран. БувкIунни барчаллагь тIисса чагъарду аьралий частирдава.
Му бакъассагу, Запорожскаллал облатьрайсса школардай оьрчIан сакин дурссар байранну, бахшишругу дуллуну чIава спортсментуран дурссар тIиртIусса тренировкартту.
Инишиял жямат чIа тIий бур аьралийтуран Ватандалул цIанийсса бигьа бакъасса къуллугърай цIуллушиву ва ссавур.
Зу сагъ-саламатну зула ужагъирттайн зана хьуннав, талихI-тирханнарайсса лахъисса оьрму булуннав Заннал.
Щак бакъар, жува ххув хьунтIиссару.
Аьлил Аьлиев
ХIадур бувссар
Андриана Аьбдуллаевал
