ДР-лул Строительствалул, архитектуралул ва ЖКХ-лул министерствалий ДР-лул ХIукуматрал Председательнал хъиривчу ХIасан Идрисовлул каялувшиврулу хьунни гьартасса заседание, тикку ххал бигьлай бия коммунал хIаллихшинну ишла давриву багьа лахъ байсса коэффициентру хIала бакьаврил масъала.
Заседаниялий гьуртту хьунни ДР-лул строительствалул, архитектуралул ва ЖКХ-лул министр Ибрагьим Казибеков, ДР-лул ПаччахIлугърал жилищный инспекциялул каялувчи Аьли Жабраилов ва цаймигу.
ХIасан Идрисовлул бувсмунийн бувну, ЖКХ-лул бутIувусса фондру гужну кугьна хьуну бур — дянивну лавсун 70% процентрал. Укунссара тагьар дур билаятрал цаймигу субъектирдай.
ЖКХ-лул сектор цIубуккан баву ва буруччаву мурадрай кьамул дурну диркIссар личIи-личIисса паччахIлугърал программартту. Амма ми бартлаган къабюхълай бур, агьалинал коммунал хIаллихшиннахсса багьри чIявуссаннал къабуллалисса тагьар духьувкун.
Агарда билаятрай ЖКХ-лухсса багьри булайсса бухьурча 87% (цаппара кIанттурдай 90-95%), жулла республикалий булайсса бур 65% агьалинал. Циняв муштаритурал булаван аьркинссар ЖКХ-лул хIаллихшиннахсса багьри.
Мува масъалалул хIакъираву гьартану бувсунни ДР-лул Минстройрал коммунал инфраструктуралул управлениялул хъунама Мавлуд Мусаевлул. Ганал бувсмунийн бувну, коммунал хIаллихшинну ишла давриву багьри лахъ байсса коэффициентру ишла буллантIиссар гьашину июльданул 1-нния махъ ва ми лахъ хьунтIиссар 1,5-лийла. Му даражалий лахъ хъанахъиссар электроэнергиялухсса, дяркъусса ва кIирисса щинахсса багьри. Шиккува бусан, багьри лахъ байсса коэффициентру ишла буллантIиссар учетрал приборду къадирхьусса муштаритурал хIакъиравугу.
Яла ххал бивгьунни жилфонд кIинтнил чIумуйн хIадур баврил хIакъиравусса масъалагу. Му масъалалул хIакъираву ихтилат бунни ДР-лул паччахIлугърал яла хъунама жилищный инспектор Аьли Жабраиловлул.
ХIадур бувссар
ХIасан Аьдиловлул
