Дагъусттаннал Росгвардиялул управлениялул «Горец» цIанилусса ОМОН-далул зузалт, отрядрал командир, полициялул полковник Рамазан Аьлихановлущал ва Управлениялул Ветерантурал советрал председатель, къуллугърая увкьсса полициялул подполковник Илияс Насирхановлущал бувкIунни Аьрасатнал Виричу,1999-ку шиная 2005-ку шинайн ияннин МахIачкъалаллал ОМОН-далул командирну ивкIсса, къуллугъ кьабивтсса милицанал полковник Загьид ЗагьидовлучIан, ванахь Ватандалул Вирттаврал кьини барча дан.
Загьид Асмалавовичлул дакIнин дуртунни къуллугъ буллай ивкIсса шинну ва аьралий дустал. Илияс Насирхановлул барча унни Виричу Росгвардиялул региондалул управлениялул хъунама полковник Вадим Кузнецовлул цIания, дуллунни щалагу Аьрасатнал виваллил иширттал органнал ветерантурал жяматийсса организациялул чулухасса «За активную работу по патриотическому воспитанию» тIисса медаль ва Ухссавнил Ккавкказуллал округрал нацгвардиялул аьралуннал командующий, генерал-полковник Владимир Спиридоновлул чулухасса грамота.
– Ялун нанисса никиран эбратрансса инсанна ина. Жу барчаллагьрай буссару вийн чувшиврухлу ва Ватандалул цIаний къуллугъ буллай бивхьусса захIматрахлу, – увкунни Насирхановлул.
Загьид Загьидовлулгу кIицI лавгунни цува рязину ушиву Росгвардиялул цIанасса никирал зузалт аьралуннал аьдатру ва буттахъал ирс лайкьну буручлай бушиврия.
ДакIнин бутан, Загьид ­Загьидов Авгъан дяъвилул ва Дагъусттаннайсса циняв аьралий иширттал гьурттучири. 1999-ку шинал ванал каялувшиндаралусса спецбатальондалул байщун бувссар ЦIумадиял, Бущихъиял районнайсса ва Къадардал даралувусса къачагътал. Мунихлу ва лайкь хьуссар Аьрасатнал Виричунал цIанин.
Андриана Аьбдуллаева