Итникьини Оьруснал театрданул Хъунмур залдануву хьунни хъунасса композитор, РСФСР-данул халкьуннал артист Ширвани Чаллаевлул оьрмулул 90 шинал юбилейран хас дурсса творчествалул вечер.
Композиторнал творчествалул ирс бур шанттуршунниха ливчусса произведениярттая салкьи хьусса: ацIния цава опера, кIива балет, симфониялул, камерный ва миллатирттал инструментирттал оркестрдансса концертру. Му щала ирсгу бур республикалул музыкалул магьирлугърал пахрулунсса, ларайсса пишакаршиврул, хIакьсса гьунарданул ва буттал аьрщи ххирашиврул эбратран бишин лайкь хьусса.
Ширвани Чаллаевлул музыка – му бур халкьуннал музыкалуву кьюлтI бувсса миллатрал код. Ванал музыка бур хасъсса философиялул мяъна куртIсса, асардал вибувцIусса.
Залдануву бия Дагъусттаннал ХIукуматрал хъунаманал хъиривчу Муслим Телякавов, культуралул министр Зарема Буттаева, паччахIлугърал, жяматрал ва магьирлугърал ишккаккулт, композиторнал уртакьтал ва ванал гьунарданул кьимат кIулми. Мажлисрал байбихьулий Муслим Телякавовлул дурккунни Дагъусттаннал бакIчинал цIаниятусса адрес.
«Вил яргсса, дакIнин дюххансса ва дакIний личIансса макьанну баллай бур художествалул ва анимациялул фильмардаву, оркестрдаву ва эстрадалий, кIулну ва ххирану дур цикссагу миллион личIи-личIисса никирттал вичIидихьултран. Барчаллагь тIий ура вихь Дагъусттаннал магьирлугърайн дакI тIайлашиврухлу, мунил цIаний захIмат бихьлай ушиврухлу, Дагъусттаннал музыкалул магьирлугъ лайкьну щала билаятран ва дунияллун ккаккан дуллай ушиврухлу», – укун тIий бур Сергей Меликовлул адресрай.
Дагъусттаннал магьирлугъ хьхьичIуннай даврил ххуллий бивхьусса захIматрахлу Ширвани Чаллаев ккаккан увну ур ХIурматрал ордендалун.
«Чаллаев – щаллусса эпохар. Буттал кIанттул музыкалул магьирлугъраву бивхьусса ванал захIматран багьа бакъассар: ванал авадан бувссар Дагъусттаннал музыкалул летопись, тарбия бувссар гьунар бусса музыкантътал, абадлий чирчуссар зунттал макьанну дунияллул симфониялул аьдатирттаву», – увкунни Зарема Буттаевал, ххуллункьини композиторнан орден дулун Москавлийн най бушивугу бувсун.
Дагъусттаннал Халкьуннал Мажлисрал депутат Марат Илиясовлул, композитор барча уллай, дуллунни Халкьуннал Мажлисрал чулухасса ХIурматрал грамота.
«Ширвани Чаллаевлул цIа ххишаласса цIардах мюхтажсса дакъар. На бусса оьрмулий хIарачат буллан икIайссияв ттула учительнаха лащан. Ширвани Чаллаев машгьурну ур, так ца жула билаятрай акъасса, дазул кьатIувгу. Дунияллун машгьур хьуну ур цала щихачIав къалавхьхьусса гьунарданийну ва халкьуннал творчествалухсса дазу дакъасса ччаврийну. Ванал захIматрайнур дунияллун кIул хьусса Дагъусттаннал магьирлугъ, хаснува учин, лакрал балайрдал ххазина. Ширвани Чаллаевлул камерный оркестрданун «Арулва лакку балай» цикл чивчуну махъ. Дайдирхьуссар Дагъусттаннал музыкалул цIусса эпоха – Ширвани Чаллаевлул эпоха. Ширвани Чаллаевлул творчествалул ирс – му бур щаллусса мяъдан. Ванал творчествалул жува бюхттул буллалиссару. Лахъи гьаннав тIий ура Ширвани Чаллаевлул эпоха», – увкунни Дагъусттаннал Композитортурал союзрал хъунама Рамазан Фаталиевлул.
«Ширвани Чаллаев ур бухкъалагайсса гьавасрал инсан. На ванащал кIул хьуссара 1992 шинал. Ттун аьркинну бия Дагъусттаннал халкьуннал инструментирттансса произведение. Нюжмардул дянив Ширвани Рамазановичлул му произведение чивчуна. Зувиллий шанна шинал лажиндарай ва произведение оркестрданул репертуардануву буссар. Ттун тIайлабацIу хьуссар Ширвани Чаллаевлущал архIал зунгу. Ца базилухь ттун багьуна Лакрал театрданул композиторнал музыкалийну бихьлахьисса «Солнечный диск» проектрал музыкалий каялувшиву дан. Проектраха зузиссаксса хIаллай на хIайран хьуну ливчIун ивкIра ва инсаннал гьавасрай. ДакIнин бутанна ца лахIза. Най дур проектрал репетиция. Ялугьлай буру Ширвани Чаллаевлух, та Ростоврая най ия. Бухха-базу хьусса артистътал бигьалаган залдануву щябивкIру, ссят дия хьхьунил урчIра шавай. Ца лахIзалуву, нузгу тIиртIун, сахIналийн ливчунни Ширвани. Артистътал шанул лях лаглай ккаккайхту, цала зумуну бюхттулну балай итабавкьуна.
Проект ххаллилсса хьуна. Ттула оьрмулуву гукунсса проект ххал хьуну акъара», – увкунни Дагъусттаннал халкьуннал инструментирттал оркестрданул каялувчи Навруз Шагьбазовлул.
Хъусращиял жяматрал чулуха Ширвани Чаллаев барча унни Качар ХIусайнаевал.
«Дяшяраву Ширвани Чаллаевлул буттал къатрал хьхьичI буссар зийлу. ЧIивиний, щинал буцIин лавгтари, ттун кIа къатлува баллан бикIайва рояльданий руцлацисса макьанну. Та заманнай архсса зунттал шяравун Прибалтиканавасса еврейнал рояль биян буван цукун дакIнин багьну бивкIссар тIий, гьарца интервьраву цIухлан бикIайва журналистътал.
Заннал аьш духьунссия тIун бикIара утти. КIа къатлуву хъуна хьун нясивну бивкIун бур щихачIав къалавхьхьусса кьадар цал бусса бюхттулсса композиторнан. Ширвани Чаллаевлун дакIних кIулссар дунияллул поэзия, кIурчIулттувух кIувкIуну, язи бугьайссар цала концертирттанми. Ширвани Чаллаевлул музыка лаласун захIматсса бур учай чIявуссаннал, жува ванал музыка лаласунсса даражалийн бивну бакъану тIий бухьунссар. Ганал щихачIав къалавхьхьусса авадансса дакIнил дунияллун аьркинну дия цайми бюхттулшивуртту.
ХIакьину жува тIий буру личIи-личIисса балайрду, учин бигьасса, къавтIаврихун бавкьусса – аьрабнал, туркнал зумунусса. Зульфия Архилаевал увкусса балайрду, гьай-гьай, учингу захIматри. Амма жува, бакIрай бавцIуну, Ширвани Чаллаевлул «Ттуршва балай» ххилтIу буллай байбивхьувкун, аьч хьунтIиссар мяъдан, авадансса ххазна, Дагъусттаннал миллатирттал ттиркьюкьи, жува дунияллия лавгун махъгума уттавану личIантIисса, жува бюхттулсса магьирлугърал агьлу бушиврул бардултну бацIантIисса.
Къабюхъанссар гимнрая къаувкуну бацIангу. Цумацагу интелегентсса, музыкалия за бувчIусса инсаннал учинтIиссар жула республикалун лайкьсса гимн Ширвани Чаллаевлул гимнри, куну. Ттуща къашай чурххавун зурзу къабагьну ва гимнрах вичIи дишин. Гиву бур зунттурдугу, неххал ххурххугу, къув-аьслил чIугу. Ттун къащи хъанай дур жува ва гимн къадуруччаву. Амма дакI дарцIуну бура, Дагъусттаннан хIакьсса гимн аьркин дагьувкун, ва гимнрайн кIура баентIишиврий.
Ширваний, вин барчаллагь! Жун ина ххирассара, вин цIуллушиву чIа тIий буру!».
Экрандалий ккаккан бунни композиторнащалсса ихтилатравасса ва канцертирттавасса бутIри, билаятрал хьхьичIунсса музыкантътурал Ширвани Чаллаевлул гьунардания ва творчествалия тIутIимур.
Республикалул язи-язими музыкалул ишккаккулт цачIун хьуну бия ва хьхьуну композиторнал гьунарданул бюхттулшиву ва илкиншиву ккаккан дан. Концертрал программалуву бия Расул ХIамзатовлул шеърирдахунсса балайрдал цикл, оркестрданул флейталущал цачIусса концерт.
Культуралул министерствалул дачин дурну дия щала концертрал тIайланнасса трансляция «ВКонтакте» социал сетьрай.
Му ккаккан бювхъуссар цащара Ширвани Чаллаевлуща ва ванал кулпат Ирина Нарскаяща.
Вечер дачин дурну бия Дагъусттаннал магьирлугърал бусравсса ишккакку Ирина Нахтигаль.
Концертрай гьуртту хьунни Дагъусттаннал филармониялул, опералул ва балетрал, Лакрал театрданул артистътал. Зульфия Архилаевал увкунни «Арулва лакку балай» циклданувасса балайрду ва Аьбдул Мурадовлущал щаллу бунни «Камаллул Башир» спектакльданувасса балай.
Культуралул министерствалул пресс-службалий бувсунни Ширвани Чаллаевлул музыка жунма баллантIий бушиву шинал лажиндарай.
Республикалул хьхьичIунсса творческий коллективрдал дуллай бушиву концертру, мукуннасса концертру хьунтIий душиву магьирлугърал идарарттай.
Зулайхат Тахакьаева
