Хасъсса аьралий операциялул гьурттучи, «Барс» тIисса хушрайминнал подразделениялул 34-мур кьюкьлувасса Сулайман Рамазановлун республикалул «Каспий» батальондалул командованиялул чулуха буллунни Барчаллагьрал чагъар.

Хушрай контракт чичиннин Сулайман Рамазанов ЦIуссалакрал райондалийсса ЦIуссалакрал шяраваллил бакIчину уссия.
«ХIурмат бусса Сулайман Зулпукьарович!
«Каспий» батальондалул командованиялул ва цинявппа аьралийтурал цIания барчаллагь тIий ура хасъсса аьралий операциялий лайкьну, эбратну бартбигьлай унутIий аьралийчувнал бурж.

Вила къуллугърайну ина ккаккан дунни лавайсса даражалул пишакаршиву, кьянкьашиву ва Ватан ххирашиву. Лавайсса даражалий къуллугъ буллай, присягалийн ва аьралий аьдатирттайн хаин къавхьуну, ина лайкьну ккаккан дунни «Каспий» батальондалул лажин.
ЗахIматсса шартIирдай къуллугърал бигарду бартбигьлай ина ккаккан дурсса чувшиву хIурматран лайкьссар.

Инагу багьа бищун къашайсса захIматрал бутIа бивхьуссар билаятрал мурадру ва халкьуннал мюхчаншиву дуруччаврил ххуллий, исват бувссар инава хIакьсса, цайминнан эбратрансса патриот ушиву», — укун чивчуну бур Барчаллагьрал чагъарданий.
Жугу барча тIий буру Сулайман Зулпукьаровичлухь лайкьсса награда.
ЦIуллушиву дулуннав, ччяни ххувшаву ларсъсса кьини ккакканнав жунна цинявннан.

Андриана Аьбдуллаева