Муний гьуртту хьунни ДР-лул Ишбажаранчишиврул ва инвестициярттал агентствалул каялувчинал хъиривчу Исмяил Оьмаров, ДР-лул муфтинал хъиривчу ва Аьрасатнал Сбербанкрал исламрал масъаларттан хасъсса советрал член АхIмад Исяев, ДР-лул Национал банкирал отделениялул каялувчи Мурад Идрисов, ДГУ-лул политэкономиялул кафедралул хъунама Низами Аскеров ва «ВЭБ.РФ Инжиниринг» ООО-лул гендиректорнал маслихIатчи Раид АьбдурахIманов.
ДакIнин бутанну, 2023 шинал сентябрьданул 1-нния шиннай Аьрасатнал мукьва региондалий – Дагъусттаннай, Башкириянаву, Татарсттаннай ва Чачаннаву – байбивхьуссар шариаьтрал принципирттал гьанулий зузисса исламрал банкинграл эксперимент. Ва закондалул проектраха зий бивкIссар АьФ-лул Министерство, Аьрасатнал Банк, АьФ-лул Госдумалул профилсса комитетру ва эксперимент зузи буллалисса регионнал властьрал органнал вакилтал.
Исмяил Оьмаровлул тIимунийну, ва хьунабакьаву хъанай дур экспериментрал системалул даврил ца агьамсса бутIану
«Агентствалул хIадур дурссар 2024-2025 шиннардий дувансса давурттал «Ххуллул карта», мивун духлай дур агьали ва бизнесраха зузими исламрал банкинграл давурттащал гьартану кIул баву. Лахьхьин буллалисса мероприятияртту, ккуркки столлу, личIи-личIисса бутIраву уртакьшиврий (партнерство) арцу итадакьаву. ХIадур шаврил лагрулий дурну дур Щалагу Аьрасатнал элмийну- практикийсса конференция кьатIаллил билаятирттал вакилталгу гьурттуну. «Ттул бизнес» центрданул площадкалий сакин дурну дур тематикалул мероприятияртту, ДР-лул Финансирттал министерствалул хIадур дурну дур финансирттал кIулшиву ларай дайсса давурттал план», –увкунни Исмяил Оьмаровлул.
АхIмад Исяевлул бувсунни Дагъусттаннал Бусурманнал рувхIанийсса управлениялул ва масъалалул хIакъиравусса пикрилия. Ванал тIимунийну, ДР-лул Муфтият чялишну гьуртту хъанай бусса бур исламрал банкинграл лябуккулуву, хIала-гьурттуну зий бур федерал къуллугъирттащал, банкирдал вакилтуращал хьунабакьавурттугу дуллай. Дагъусттаннал муфти АхIмад-хIажи Аьбдуллаев цува усса ур му бутIувусса давурттал ялув ацIаву дуллай ва кабакьлай усса ур исламрал банкинграл сиптардацIун.
Мурад Идрисовлул тIимунийну, декабрьданул 1-нний Дагъусттаннай Аьрасатнал Банкирал реестрданий дусса дур кIира региондалул сакиншинна, ми дакъассагу, республикалий зий бусса бур федерал банкирдал кIива офис. Ва куццуй, реестрданувун официальныйну уххан увну ур мукьа гьурттучи. Билаятрай Аьрасатнал банкрал реестрданий хIисавну дур экспериментравух гьуртту хъанахъисса 33 сакиншинна.
Агьалинал банкирдай арцу дишаврил чулуха тагьар укунсса дур: республикалий агьалинал бивхьуну бур 200 млн къурушрал – ми хъанай дур Аьрасатнал агьалинал дирхьуминнул 5 процент.
Республикалий банкрал хъунмурчIин буллай бур «Мубараха» тIисса операция, мунил мяъна хъанай дур хъус даххаву ялун ххи бувсса багьлий (продажа товаров с наценкой).
«Национал банкирал отделение чялишну зий бур эксперимент бартбигьавриха: ХIукуматращал ва РувхIанийсса управлениялущал хIала-гьурттуну дуллай буру хъуннасса сакиншиндарал ва информациялул даву. Жул хьхьичIсса хъунмур масъала хъанахъиссар цIусса гьурттучитал кIункIу баву ва ми зуншиврул миннан аьркинсса шартIру дузал даву», – увкунни Мурад Идрисовлул.
Низами Аскаровлул бувсунни ДГУ гьуртту хъанай бушиву исламрал ххуллий арцул иширттал пишакартал хIадур баврил экспериментравух. Ванал тIимунийну, гьуртту шаврил лагрулий ДГУ-лул чIумуя чIумуйн буллай бусса бур исламрал зумуну арцу итадакьаврин хас бувсса ккуркки столлу. Микку ххал бигьайсса бур аьмсса масъалартту бакъасса, партнертуран арцу итадакьаврил ляличIишиврул масъаларттугу. Университетраву тIивтIуну бур Элму ахттар дувайсса исламрал экономикалул центр.
Раид АьбдурахIмановлулгу бувсунни эксперимент бачин баврил хIакъиравусса цаламур пикри. Ванал бусаврийну, 17 шинай ва зий ивкIун ур дазул кьатIувсса исламрал финансирттал идарарттай. Раид АьбдурахIманов зий усса ур стандартру хIадур даврил иширттаха.
ХIасан Аьдилов
