Луганскаллал областьрай къуллугъ буллалисса Аьбдулссамад Гъазиев вай гьантрай отпускалий шавайн увкIунни. Хасъсса аьралий операциялий щаву дирсса жагьил ца зуруйсса реабилитациялийн итаавкьуну ур.

Аьбдулссамад увну ур 2006 шинал январь зурул 3-нний ЧукIуннал шяравасса Мирзабаглул ва Ккулатусса ПатIиматлул кулпатраву. Ва жунма ххуйну кIулсса лакрал шаэр Бахттун Гъазиевал арснал оьрчIри. Ванан дахьра 19 шин дур. МахIачкъалаллал 34-мур школагу къуртал бувну, Аьбдулссамад лавгун ур аьралуннаву къуллугъ бан. Къуллугъ буллай ивкIун ур Нижегородскаллал областьрай. Ца шинава контракт чирчуну, тихава хасъсса аьралий операциялийн лавгун ур. СВО-лий къуллугъ буллай ур РХБЗ-лул аьралуннал (войска радиационной, химической и биологической защиты) батальондалуву. Апрель зуруй ванал контрактрал чIун къуртал хъанай дур, амма Аьбдулссамад гихунайгу къуллугъ буллансса пикрилий ур. КIицI лаган, Абдулссамадлул буттал ниттил Бахттуннул ппу Кьурбан Оьмаровгу. Буттал кIанттул цIанийсса Хъунмасса дяъвилий Ватан дуручлай ивкIссар. 1945-ку шинал зана хьуссар. Цуксса къаччайнугу, цал уттигу Ватан дуручлансса бувккунни жула халкьуннан. Ци банссар, иш мукун багьнавхьур, дуркIсса кьини, жула ттаттахъал кунна, чувшиврий лахъан аьркинни. Ччяни баяннав жунма ххувшаврил хавар. Ххарину, цIуллуну зана хьуннав цинявппагу аьралийтал.
– Аьрасат – гуж хъунмасса билаятри. Душмангу ххит увну, ххувшаврищал зана хьунтIиссару, – тIий ур жагьилсса аьралийчу.

Андриана Аьбдуллаева