МахIачкъалаллал 30-мур лицейрал дуклаки оьрчIал ххуйсса гьурттушинна дунни Ватан дуруччайминнал шинан хас ­дурсса творчествалул конкурсрай. Цалчинмур кIану бувгьунни жулва лаккудушнил, 2-мур классраву дуклакисса Агъаева Марияннул.

Ванил ппу Расул Къяннал шяравасса ур, нину Амина– ЦIущарниясса. Амина цуппагу Аьрасатнал Виричу Шамил МахIаммадовлул ниттирссу бур.

Марияннул бувсунни суратраймагу цила ссурахъу Шамил ушиву:
«Шамиллул нину Сабина МахIаммадова ттул ниттил хъунмур ссур. Сурат дихьлахьисса ппурттувугу ттун ккаккан дуван ччай бия цал архIал Вирттаврал чувшиву, ниттихъахсса ччаву, кулпатрайсса дакI цIуцIаву. Гьаннайсса, кулпатравусса гъилишиву, нахIушиву ккаккан дуван.Ттул ниттирссил кулпатгу мукун куннан кув ххирасса, куннал куннаха хIурмат байсса кулпатри. Ватандалухсса ччавугу агьамсса, патриот асардугу хьхьичIунсса. Мунияту пикри хьуна Шамиллул сипат гьанулун ларсун сурат дуван. Цалчинмур кIанттун лайкь шаврийну ттущава бювхъухьунссар хьхьичI бивхьусса мурад бартбигьин», – тIий бур Мариян.

Нагу исват буллай бура ванил цилва мурад лахъсса даражалий щаллу бувшиву. Усттарну дирхьусса сурат дур бюххансса асарду дакIнивун бичлачисса. Магьирлугърал ххуйшиврул биялагу мунивур бусса. Инсантурал дакIру хъюлчай учин дувавриву.
ЧIивисса душнилгума дюрхъуну дунни му даву. Гьунаргу бунутIий, гьунарданучIа дишинсса ххуйсса дакIгу дунутIий.

ПатIимат Рамазанова