«Доблесть гор» программалуву гьуртту хъанахъими вай гьантрай бивунни ПатIимат ХIамзатовал цIанийсса Дагъусттаннал изобразительный искусствалул музейравун.
Вайннащал хьунабавкьунни республикалул культуралул министр Зарема Буттаева, кIицI лавгсса музейрал директор СалихIат ХIамзатова, Дагъусттаннал Чичултрал союзрал председатель Марина АхIмадова, Дагъусттаннал паччахIлугърал филармониялул худрук Ирина Нахтигаль ва цаймигу бусравсса вакилтал.
Программалуву гьуртту хъанахъиминнахь Зарема Буттаевал барчаллагь увкунни, Ватандалул Вирттаврал кьинилул хьхьичI кьини дяъвилул майданнай чувшиврий жанну дуллуми дакIнин бичинсса хIукму буваврихлу. ЧIурчIав дунни программалул гьурттучитал хIакьсса чувшиврул ва Ватандалул аьрщарал рувхIанийсса гуж-кьуватрал лишанну хъанахъишиврий, Аьрасатнал президент Владимир Путиннул мудангу лахъсса кьимат бищайшиврий культуралун. Бувсунни хъамаллурахь республикалий паччахIлугърал 5 музей зий бушиву, 12 театр, мукунма культуралул центрду, библиотекартту, фольклорданул ансамбльлу.
Министрнал бувсунни искусствалул зузалтгу, даврил график къабигьасса бунугу, гъирарай рязий хьушиву «Каспий» батальондалул талаталтран концерт ккаккан дуван.
«Культуралул зузалт цимилагу бивссар аьралийтуран концертру ккаккан дувангу, хъин хъанахъиминнал дакIру тирх учин дуван госпитальлайнгу, хIала бувхссар гуманитар кумаграл давурттавухгу. ДакI ххари хъанай дур жагьилсса артистътурангу бувчIлай бушиву дуллалисса даврил агьамшиву. Ца жагьилсса артистнал увкусса: «На ттулла Ватандалул хъунмасса тарихрал ца чIивисса бутIану хьун ччай ура» тIисса махъру билаятрал цашиврул, Ватандалийн дакI тIайлашиврул лишанну хьунни», – увкунни Зарема Буттаевал.
Марина АхIмадовал бувсунни Чичултрал союзрал даврия, кIицI лавгунни захIматсса чIуннардий аьралийтурал дакIру поэзиялул цIакь дувайшиву ва хIакьинусса кьинигу вирттаврал чувшиврия бусласисса чIявусса патриот произведенияртту чичлай бушиву.
Ирина Нахтигальлул бувсунни Дагъусттаннал филармониялул даврия. Шиккува музейраву филармониялул солистътурал увкунни балайрду, щаллу бунни классикалул ва аьралий темалул композицияртту.
СалихIат ХIамзатовал экскурсия бунни музейраву, бувсунни кьиматрайсса экспонатирттая.
Хъамал барчаллагьрай бия Дагъусттаннал культуралия чIявусса затру кIул баврихлу цащалва хьунабакьин бувкIцириннайн.
