Вай гьантрай Ккуллал райондалийн даврил аьрххилий увкIунни Дагъусттан Республикалул МЧС-рал министр Нариман КазимахIаммадов.

Ванащал бия МЧС-рал биялдарайсса «Служба – 112» идаралул каялувчи Жамалуттин Баговлул ва ЦIу лачIаврища мюхчан бай къуллугърал хъунама ХIусайн Хамавов.
Вай хьунабавкьунни райондалул агьалинащал, цIухху-бусу бунни цукунсса масъаларттащал хьунабакьлай буссарив райондалул жямат.

Хъусращиял шяраваллил администрациялул бакIчи Арсен Алларазуевлул дунни гъараллу ларчIун левкьсса Хъуннеххайхсса ламу бан кумаг баврил хIакъиравусса лаизаву. Ваччиял шяравасса ХIусайн ХIажикьурбановлул гьаз бунни ШавкIуллал шярава ливчусса лахъазаннуйсса ламу баврилмур масъала.
Ккуллал шяравасса Жамал Оьмариев увкIун ия ччя-ччяни ттукI лешлай, азурда хьуну бушиву бусан.

Ваччиял шяравасса ТIагьир Абакаровлул гьаз бунни райондалийн газ буцаврил масъала.
Гьарица сукку бувсса масъалалул хIакъираву министрнал бунни хасъсса маслихIатру, бувсунни ми дузал баврил ялув ацIантIишиву.
Ккуллал райондалийсса вацIлуцIух ларчIун диркIсса цIу лещан дан хIарачат баврихлу Нариман КазимахIаммадовлул Барчаллагьрал чагъарду буллунни 2-мур ЦIувкIуллал шяраваллил бакIчи Нураттин Рамазановлун ва мура шяравасса Альберт Аьбдуллаевлун.

Нариман КазимахIаммадов бакIчисса делегация хьунабавкьунни райондалул школардал дуклаки оьрчIащалгу. Ваччиял школалийсса «Классные встречи» тIисса проектрал лагрулий Руслан Кулиевлул дуклаки оьрчIахь бувсунни генерал-майор Нариман КазимахIаммадовлул оьрмулул ва захIматрал ххуллия.
Ккуллал райондалул бакIчинал бигарду чIумуйну бартбигьлагьисса Ажуб ХIусмановлул барчаллагь увкунни райондалул жяматрах хъуннасса къулагъас дурсса хъамаллурахь.

Имара Саидовал