ТIайламур бусан, жува аьдат хьуну буру къаххуймур информация агьалиначIан биян буван СМИ чIявуну чялиш буккайсса бушивруцIун.
Ва базилухьрив ххари хьунна федерал СМИ-лул ххуймур гьаз баврия. Социал сетирдай махъ ппурттувусса сюжетирттаву ца яла дакI хъюлчай учин дуванмур ва пашмангу, ххаригу дуванмур духьунссар ва видео: Каспийск шагьрулий нажагьсса къашайшиву – ихтиоз дахчусса (чIимучIалттул синдром учай ва азарданийн) Рашид Уруджев тIисса оьрчI архIал дуклакиминнал доскалучIан изан увну, вив лавсун, хъямала багьлагьисса видео. Сюжетрай буслай бия гьалмахтал Рашидлущал мудангу тIуркIу тIий, хIала бувххун, аякьалий ва хIурматрай бушиву. Укунсса дусшиврул, хъиншиврул ххуллий оьрчIру къуццу тIий бушиврий хъунмур биялагу классрукнал бушиву. Мукунма нитти-буттахъалгу.
Рашид шава дуклакиминнавух унугу (домашнее обучение), директорнал ихтияр дуллуну дур школалийн занан.
Цамур куццуй бикIан къааьркинссар учинмигу буккантIиссар. Бурхха цамур куццуйсса ишругу. ОьрчIру ва чIаважагьилтал архIал дуклакиминнай, лагма-ялттуминнай зулму буллалисса кIантту. ЦIакь буминналсса ва чIаравбацIулт буминналсса бацIлацIисса, миннай тахсир бунугума.
Билаятрал СМИ-лул ккаккан бунни мукунми иширттайн муттаэну бацIансса иш: азарданул рахIму къабувнай инсантурал рахIму буллай бушиву, цIимилийсса бургавугу, аякьагу душиву. Билаятрайх ппив хьусса ва сюжет асар хьуну, гьар регионная, Рашидлун дакьайрив, дучIи шайрив тIий, бурчуйх дуккайсса жура-журасса кремру гьан дуллай бур инсантал. Рашид ххари-ххарину буслай ур цачIанма гьарцагу мурцIния ссайгъатру букIлай бушиврия.
Шиккува кIицI лаган, укунсса оьрчIан бурчуйх дуккансса кремрал ца тюбик бусса бур азарда къурушран, гьантлун ца тюбик аьркин шайсса бур. Крем чара бакъа гьантлун кIийлла дуккан аьркинну бур. Нину Сабина оьрчIал лажиндарайх ва каруннийх переменалий крем дуккан бучIайсса бур. Амма, диагноз къабигьасса духьурчагу, Рашид цувама тяхъасса, дакI тIиртIусса оьрчI ур. Агьали барчаллагьрай бур Каспийскалий куннал кув бувгьусса, дусшиву дусса, дакIру хъинсса оьрчIру тарбия бувцириннайн. Хъиншиву дуван гьуз учин буллай бур. Хъиншиврул, хъинбалдаралсса ххуллиймур даву мудангу чанначIансса, ххуймуничIансса хъитри.
Ихтиозрал инжитсса оьрчIру хъин бувансса чарангу лякъинхьуви медициналул. ХьхьичIуннай хъанайгу духьувкун.
