Декабрьданул 1-нний «Доблесть гор» программалул лагрулий ДР-лул экономикалул министр ХIажи Султановлул каялувшиндаралу хьунни республикалул экономика хьхьичIуннай даврин хас бувсса семинар.
Шикку гьуртту хьунни оьрму-хIал ккавксса, Ватандалийн дакI тIайласса патриотътал ва СВО-лул ветерантал. Министрнал кIицI лавгунни, хьхьичI бивхьусса захIматсса масъалартту чулийн буккан бан нигьакъабувсъсса инсантурайн вихшала бан лайкьшиву каялувчитурал кадрарду. Шикку мюрш бивкIун ххал бивгьунни республикалул экономика хьхьичIуннай дансса ххуллу-чаранну, бувсунни гихуннай дуллантIисса даврия.
ХIажи Султановлул мукунма бувсунни цала каялувшиву дуллалисса ведомствалул даврия, региондалий иширайну зузи дурсса программарттая, проектирдая, экономика хьхьичIуннай даврия ва хIакьинусса экономикалул тагьардания.
– Программалул лагрулий ларсъсса кIулшивуртту районнал, республикалул властьрал органнаву хайр-мюнпат буну ишла данссар тIисса умуд бур, – увкунни ХIажи Султановлул.
Гьурттучитуралгу, сант дирирну дуна, личIи-личIисса суаллу буллунни министрнахьхьун. Хасъсса аьралий операциялул ветераннал цIувххунни цIанасса ппурттуву циванни чIявуми ттучаннай ва кафердаву терминаллайхчIин ягу карталийхчIин арцу дулунсса къулайшиннарду дакъасса, куну.
– ЧIявуми кафердаву, ттучаннай, арцу дулара тIий, карта кьамул дуллай бакъар. ТIайламур бусан, ттунгу, на кунмасса цайминнангу арцу карталийхчIин дуллуну къулайшиву дикIанссия. ХьунтIиссарив ва масъалалул хIакъираву ишбажаранчитуращал ххуллу ласун? – куну, цIувххунни ветераннал.
ХIажи Султановлул дуллунни ва суалданухьхьунсса балжисса жаваб.
– Хъинну тIайласса ва цIанасса чIумуцIун бавкьусса суал бур. Мяйжаннугу, чIири-хъунсса бизнес дачин дурсса цаппара ишбажаранчитал бур электрон журалул хIаллихшиннарду ишла дан анавар къабуклакисса. ХIакьинусса кьини бизнесраха зузисса инсантал заманалул тIалавшиннардайн бувну къуццу тIун аьркинссар. Электрон журалул шартIирдайн бучIаврийну, экономика ххютула дуккан даврин бакъассагу, бизнес лядукканссагу кумаг хъанахъиссар. Ванийну республикалул экономикалун ва ишбажаранчитуран хIасул хъанахъиссар даркьусса, аьчухсса шартIру, – увкунни ХIажи Султановлул.
Министрнал мукунма бувсунни республикалул даражалий кьамул дурсса, бизнес тIайлану дачин дуллансса шартIирдаягу. МуницIун бавхIуну кIицI лавгунни, бизнесрал даву электрон журалул кьяйдардайн дуцинтIишиву.
Семинарданий личIиссара къулагъасрайн лавсунни социал экономика хьхьичIуннай даврил, налогирттал шартIру къулай даврил, хаснура бизнесрал налогирттал системалун, шяраваллил хозяйствалун ккаккан дурсса налогирттал куклушиннарду 2026 шинал ахирданийннингу дусса куццуй ритантIишиву.
ДакIнийн бутанну, Дагъусттаннал бакIчи Сергей Меликовлул сипталийну республикалий дайдирхьушиву «Доблесть гор» тIисса региондалул программа. Ва дур хасъсса аьралий операциялул гьурттучитуран хас дурсса «Время героев» тIисса федерал программалул аналог. Программалул цалчинмур модульданул лагрулий, каялувчитурал кадрарду хIадур буллай, хасъсса аьралий операциялул гьурттучитуран кIулшиву дуллай бур властьрал органнал вакилтал.
Ва кьинисса семинарданий ХIажи Султанов хьунаавкьунни хасъсса аьралий операциялий чувшиврий жан дуллусса цала уссил, Муртаза Султановлул, махъва-махъсса ссихIирачIа ивкIсса ванал аьралий гьалмахчунащал.
– Программалул гьурттучитал на ттула уссурвавран ккалли бара. ТIайламур бусан, ттуйнна зущал хIала-гьурттуну зунсса вихшала даврия дакIнихтуну ххариссара. Дагъусттаннал бучIантIимур зу кунма къирият дусса инсантураяр хъар хъанахъисса. Ттул хъуннасса вихшала дур, зула аьралий опытгу ишла бувну, тIайламунил чул бувгьуну, хьхьичI бивхьусса мурадру бартбигьавриха зунссару тIисса, – увкунни ведомствалул каялувчинал.
ХIажи Султановлул дакIнин бивчунни аьпалул хьуннин хьхьичIсса цаппара гьантрай цала уссил увкусса махъру.
– Видеозвонокрай оьвтIий уссияв, уссил кьяпуйсса чичру чIалай, цIувххуссия, микку ци чивчуну бур куну.
«Талан кIулли. Ватан ххирар», – куну жаваб дуллуна уссил.
Имара Саидова
