Ноябрьданул 14-нний «Дагестан» РИА-лий хьунни ДР-лул Ишбажаранчишиврул ва инвестициярттал агентствалул вакилтурал пресс-конференция.
Муний гьуртту хьунни Агентствалул инвестициярттал политикалул отделданул хъунмур Мария Жамалуттинова, Агентствалул зузала ПатIимат Асланбекова, ДР-лул Гарантиярттал фондрал каялувчи Казимбек Оьмаров, «Даглизингфондрал» микрофинансирттал компаниялул каялувчи МахIаммад Аьрипов, «Радикс IT» ООО-лул технический лидер Мирза Мустапаев.
Хьунабакьаврий ххал бивгьунни укунсса масъалартту:
2025 шинал 10 зурул мутталийсса инвестициярттал давурттал хIасиллу: основной капиталданувунсса инвестициярттал лагру, пландалийсса ккаккияртту биттур даву. Инвестициярттал проектирдал реестр. ПаччахIлугърал чулухасса кумаг баву ва цаймигу.
Мария Жамалуттиновал бувсмунийн бувну, 2025 шинал 10 зурул мутталий основной капиталданувунсса инвестициярттал лагру, дукIумур шинал вара чIумух бурувгун, гьарза хьуну дур 20,8 процентрал. Республикалул инвестициярттал проектирдал реестрдануву 72 проект дур инвестициярттал аьмсса лагру 494 млрд къурушраха лирчусса, миннул кумаграйну дузал буван бюхъантIий бур 25 азарунниха ливчусса цIусса зузи кIанттурду.
Агентствалул бартбигьлай дур инвестортуран кумагрансса цаппара давуртту, миннувух – налогирттал хIаллихшинну, субсидияртту, торгру къадурна аьрщарал участокру дулаву. 2025 шинал Агентствалул хIарачат бунни ишбажаранчишиврул ва инвестициярттал иширттахун багьсса субъектирттан паччахIлугърал чулухасса кумагру буллан, мукунма норматив-праволул база цIу буккан бувангу.
ЧIиримур ва дянивмур ишбажаранчишивруву хъин чулийсса дахханашивуртту хъанай дур. Гьашину 10 зурул мутталий ишбажаранчишиврул субъектру гьарза хьуну бур 6,4 процентрал, цайнува цивппа зузисса (самозанятые) –12,3 процентрал.
Гьашину чIиримур ва дянивмур ишбажаранчишиврул субъектру арцул дузал буван личIи дурну дур 44,25 млн къуруш, арцуйну кумаг буван личIи дурну дур 33 заявка.
ЧIалачIисса хьхьичIуннайшивуртту хьуну дур инвестициярттал проектирдал лагрулийгу: миннувасса ххюра проектрал дузал бувну бур сайки азарва зузи кIану.
Казимбек Оьмаровлул тIимунийну, Фонд хьхьичIунну зий бур инвестициярттал проектирдащал ва махъсса шанна шинал мутталий арулла проектравун кIункIу дурну дур ца миллиард къурушраяр ххишаласса арцу.
ХI. Аьдилов
