Итникьини Апанни Къапиевлул цIанийсса Лакрал паччахIлугърал ва драмалул театрдануву хьунни хъуннасса байран – театр дунияллийн бувккун 90 шинал савлугърал мажлис.
Революция хьуннинсса лакрал шаэр МухIуттин Чариновлул цува Бакуя гъинтнил каникуллай игьалаган шяравун увкIсса ппурттуву хIасул дурсса жагьилтурал кружокрая байбивхьуну, Ухссавнил Ккавкказнал миллатирттал театрдал дянив хьхьичIунсса ххуттайн бияннин къабигьасса, амма пахрулун лайкьсса ххуллу бивтун бур жула театрданул.
Чансса дакъар Дагъусттаннал театрал магьирлугърал тарихраву мусил хIарпирдай чирчусса цIарду ва ярг-яргсса постановкарду.
ЮбилейрацIун бавхIуну хIакьину жува дакIнийн бичлай буру театр лявхъуния шинмай му ччаннай бацIан баврил ва хьхьичIунмай баврил ххуллий оьрму бувтсса артистътал.
Барчаллагь тIий буру миллатрал язимур ххазина буруччаврил цIаний хIакьинугу багьа бищун къашайсса захIмат бихьлахьисса артистътурахь.
Барча тIий щалва миллатрахь театрданул юбилей, Камил Чутуевлул ххуржинтту аьч дурну, дакIнийн бичлай буру театрданул тарихравасса язи-язими лахIзарду.
Театрданул яла хъуними хьхьичIуннайшивуртту хьхьичI лякъиннав тIий лагубизлай, чIа тIий буру хIакьину зий-заназисса артистътуран цIуллушиву ва тIайлабацIу! Аьпа баннав жула дянива лавгми артистътуралгу.
