МахIачкъалалив, Дагъусттаннал техникалул колледжраву, «Есть такая профессия – Родину защищать» тIисса акциялул лагрулий хьунни студентътуращалсса хьунабакьаву.
Жагьилтуращал хьунаакьин увкIун ия Тверь шагьрулул Аьралуннал ва космосрал академиялул вакил, радиолокациялул разведкалул отделениялул хъунама Дмитрий Сошин.
Мукунма шикку гьуртту хьунни колледжрал хъунаманал хъиривмур Фатима Руслановна, МахIачкъалаллал аьралий комиссариатрал пресс-секретарь, аьралий къуллугърайн буцаврил давриха зузисса отделениялул хъунаманал кумагчи Аьйшат Аьбдуллаева, «Синергия» университетрал вакил Амина ТIагьирова, Дагъусттаннал гуманитар институтрал вакил Рамазан Аьбдулхаликьов. Вайннал гьарта-гьарзану бувсунни цала-цала дуккаврил идарарттая, хьхьичIуннайшивурттая, тIалавшиннардая ва дуклакиминнансса куклушиннардая, балжисса жавабру дуллунни студентътурал суаллахьхьун, оьвчаву дунни цачIанма дуклан буххан.
Совет Союзрал маршал Г.К.Жуковлул цIанийсса Воздушно-космический обороналул аьралий академиялувун буххан бюхълай бур 16 шинава 22 шин хьуннинсса оьрмулувусса, аьралий къуллугъ къалавхъсса жагьилтураща, призыврай аьралуннаву къуллугъ бувсса ва буллалисса аьралийтураща оьрмулул 24 шинавун бияннин. Контрактрай аьралуннаву къуллугъ буллалиминнаща – оьрмулул 27 шинавун бияннин. Академиялувусса дуккаву украссар. Буссар общежитие, шаннагу чIумухсса украсса дукра. Диплом лавсун махъ дузал буллалиссар даврил. Стипендия буссар 30 азарда къурушрая ливчусса. Академиялуву буссар дуккаврил, элмийсса ва спортрал секциярду.
«Синергия» университет бур Аьрасатнал хъунисса вузирдавасса ца. Ванил гьану бивзун бур 1995-ку шинал. Шиву лахьлай бур юриспруденция, экономика, лингвистика, мукунна ласлай бур ттизаманнул кIулшивуртту: геймдизайн, анимация, киберспорт ва м.ц. Университетраву дарс дихьлай бур хъунисса компаниярттаву зий гьаз хьусса экспертътал. Шиву дуклан бюхълай бур заочнайнугу. Университетраву бур 40-нния ливчусса факультетру. Къуртал бувну махъ буллай бур паччахIлугърал кунмасса дипломру.
Дагъусттаннал гуманитар институтрал агьаммур бурж бур лингвистикалул, журналистикалул, исламрал теологиялул, экономикалул, бизнес-информатикалул лавайсса даражалул пишакартал хIадур баву.
Жагьилтураща бюхъайссар цанма ччимур вуз, факультет язи бувгьуну дуклан буххан.
Андриана Аьбдуллаева
