Ларгсса итникьини Оьруснал театрданул Хъунмур залдануву, илгу бавтIун, лайкьсса даражалий хьунни А. Къапиевлул цIанийсса Лакрал паччахIлугърал драмалул ва музыкалул театрданул 90 шинал юбилейран хас бувсса мажлис.
Ва хъанай дур Дагъусттаннал миллатирттал театрал магьирлугъ хьхьичIуннай шавривусса щаллусса эпоха. Лакрал театрданул цIанихсса творчествалул ххуллугу хъанахъисса.
Шадлугъ тIиртIунни ДР-лул Халкьуннал Мажлисрал хъунаманал хъиривчу Камил Давдиевлул:
– Ва юбилейрал дата хъанахъиссар Дагъусттаннахсса ччаврил бавхIусса щаллусса эпохану. Зул театр хъанахъиссар республикалул рувхIанийшиврул, мяърипатрал ва эстетическийсса тарбиялул центрдавасса ца. Мунил халкьуннал аьдатру, ягудурну, чIяру дуллалиссар, – увкунни Давдиевлул.
Театрданул каялувчинан ва зузалтран дуллунни парламентрал чулухасса наградартту.
ДР-лул культуралул министр Зарема Буттаевал кIицI лавгунни Лакрал театрданул бушиву ляличIисса коллектив, гьунар бусса, бунияла сахIналийн дакI тIайласса.
– Ва бур гьарца оьрмулул инсаннан кIулшиву дуллалисса театр-просветитель, лакку маз буручлачисса ва машгьур буллалисса кюру. Лакрал театрданул сахIналий бихьлай бур, миллатрал драматургиялул произведенияртту бакъасса, оьруснал ва дунияллул классикалул произведениярттугу. Так махъсса шинну ласурчагума, Лакрал театрданул сахIналий хьуну бур тамансса ххаллилсса премьерартту, чулийн бувккун бур бюхттулсса наградарттан ва тамашачитурал барчаллагьран лайкь хьусса театрал проектру.
Укун аншлаграйсса премьерартту тIурча циксса бивкIун бакъар театрданул тарихраву. Циксса бивкIун бакъар театрданул цIа дуккан дуллай бивкIсса хьхьичIунсса артистътал, режиссертал, сценографтал, драматургтал ва цаймигу пишакартал! Вайннал цIарду ва вайннал ирс жула мусил фондри, – увкунни министрнал.
Дагъусттаннал Театрал ишккаккултрал союзрал хъунама, Аьрасатнал лайкь хьусса артист Айгум Айгумовлул театрданул зузалт барча бунни Аьрасатнал Театрал ишккаккултрал союзрал хъунама Владимир Машковлул цIания.
– Аьрасатнал миллатирттал театрдал кулпатраву Лакрал театрданул бугьлагьиссар агьамсса кIану. ХIакьинунин ядуллай буссар цала аьдатру, региондалул магьирлугъ хьхьичIунну ккаккан дуллай буссар Аьрасатнал ва Дунияллул халкьуннал дянивсса фестиваллай.
Театрданул коллективрахь юбилей барча дунни театрданул хьхьичIунсса дус-ихтивар Юсуп МахIаммадовлул, ДР-лул Жяматийсса палаталул хъунаманал хъиривчу Сапар Аьбдуллаевлул, Лакрал райондалул бакIчи Зураб Куччаевлул, Ккуллал райондалул Шяраваллил хозяйствалул управлениялул каялувчи Александр Маммаевлул ва цайминнал. Вайннал театрданул магьирлугъ ядаврил ва хьхьичIуннай даврил, чIаважагьилтал магьирлугърахух гьан баврил ххуллий бихьлахьисса захIматрахлу буллунни Барчаллагьрал чагъарду.
Театрданул каялувчи Бадрижат МахIаммадхIажиеван дуллунни «Лакрал райондалул бусравсса гражданин» тIисса ларайсса цIа.
Экрандалий ккаккан дунни Лакрал театрданул цIа дуккан дурсса артистътурал цIарду. ДакIнийн бувтунни аьзизсса театрдануву зий бивкIсса, Дагъусттаннал сахIналул магьирлугъ хьхьичIуннай даврил ххуллий багьа бищун къашайсса захIмат кьабивтсса театровед Гулизар Султанова.
КIицI бан багьлай чIалай бур, Лакрал театрданул сахIналий тамансса бивхьуссар классикалул ва ттизаманнул драматургиялул спектакллу: «Ревизор» ва «Женитьба» Н.Гогольлул, «Свадьба Кречинского» А.Сухово-Кобылиннул, Р. ХIамзатовлул произведениярттаясса мюзикл «Колесо жизни», М. Къажлаевлул музыкалухунсса «Аьрщи ва ссав», «Камалил Башир», «Хан-Муртазааьли», «Оьтту ва макь» Ширвани Чалаевлул музыкалунсса.
Юбилейрал байрандалуцIунсса программалул лагрулий экрандалий ва сахIналий ккаккан бунни театрданул репертуарданува тамашачитуран яла-яла ххира хьусса спектакллавасса бутIри.
Зулайхат Тахакьаева
