Дагъусттаннай, ДР-лул ХIукуматрал хIукмулийну, цIакь дунни «Сохранение, изучение и развитие государственных языков Республики Дагестан» тIисса ДР-лул паччахIлугърал программа. Ва цIакь дуван аьркиншиврул хIакъираву бувсун бивкIссар Дагъусттаннал бакIчи Сергей Меликовлул ДР-лул Халкьуннал Мажлисрайнсса Рисалалуву.
Программалул мурад хъанахъиссар Дагъусттан Республикалул паччахIлугърал ва цаймигу миналул (коренные) мазру ябуллансса, лахьлансса ва лябуккан буллансса шартIру дузал даву.
Программа кьамул даврил хIакъираву ДР-лул ХIукуматрал председатель Аьбдулмуслим Аьбдулмуслимовлул тIимунийну, Дагъусттаннал мазурдийн цIанасса ппурттуву бухлагавриясса нигьачIаву диллай дур. Дагъусттаннал цаппара мазру личIинува буруччин багьну бур, ми кIулсса инсантал лапва чансса ливчIун бунутIий. Мукунсса мазру хъирив наними никирттан кIулну къабикIанссар тIисса нигьачIавугума дирну дур. «ПаччахIлугърал программалул мурад хъанахъиссар жула республикалул мазру ябаврил, лахьхьаврил ва ми лябуккан баврил давурттаву паччахIлугърал властьрал органнал, кIанттул цилакаялувшиврул, элмулул ва дуккаврил идарарттал, граждан обществалул институтирттал хIарачатру цачIун баву. Программа бартдигьаврил кумаг буллантIиссар Дагъусттаннал миллатирттал мазру ишлану бикIаншиврул аьркинсса правалул, сакиншиндарал, элмийну-методикийсса ва информациялул шартIру дузал дуллан», – увкунни Аьбдулмуслим Аьбдулмуслимовлул.
Дагъусттан хъанай бур Аьрасатнал Федерациялул яла чIявуми миллатругу, мазругу буми регионнавасса ца, шикку ялапар хъанай бур 30-нниха ливчусса миллатирттал, 110-нниха ливчусса чIиви миллатирттал вакилтал, миннал бур цанма хасъсса мазругу, диалектругу, культурагу, аьдат-эбадатругу.
ДР-лул Конституциялийн бувну, республикалул паччахIлугърал мазруну хъанахъиссар оьрус маз ва Дагъусттаннал миллатирттал мазру. Республикалий ялапар хъанахъисса циняв миллатирттан гарантия дуллалиссар ниттил мазру буруччин, ми лахьлансса ва лябуккан буллансса шартIругу дузал дуван.
Яла чIявуну ишлану буми хъанахъиссар: оьруснал, яруссаннал, агъуллал, азирбижаннал, даргиял, къумукьнал, лакрал, лазгиял, нугъайнал, рутуллал, табасараннал, татнал, цIахъюрдал, чачаннал мазру.
Республикалул яла чIявуми миналул миллатру, 2020 шинал агьали сияхIрайн ласаврил хIасиллайн бувну, хъанахъиссар: ярусса, дарги, къумукь, лазги, лак, табасаран, азирбижан, чачан, оьрус, нугъай, агъул, рутул, цIахъюр ва цаймигу.
