МахIачкъалалив, АьбдулхIамид Юсуповлул цIанийсса кIичIираву, шадлугърал даражалий тIиртIунни «Формирование комфортной городской среды» федерал программалул лагрулий цIу дуккан дурсса 29-мур къатлул хIаят.
Шиккун бувтIунни асфальт, бивхьунни чирахъру, скамейкарду, бунни оьрчIру тIуркIу тIунсса площадкартту ва беседкартту.
Аьмну 3000 кв. метралийн бивсса кIанттурду бакьин бунни.
– ХIакьину Ислам МахIачевгу ххув хьунни, жулла хIаятгу ххуй дунни, – тIий ур ххарину шадлугърай гьуртту хъанахъисса чIава жагьил.
Къатлуву ялапар хъанахъими ва хъамал шагьрулул каялувчитурал чулуха барча бунни МахIачкъала шагьрулул бакIчинал хъиривчу МахIаммад Амирхановлул. Ванал кIицI лавгунни къатрал хIаятру дакьин даву хьхьичI ххуттайн лавсъсса масъаларттавасса ца бушиву ва му давугу шагьрулул агьалинал сипталийну ва кумаграйну дуллай бушиву.
Мероприятиялий мукуна гьуртту хьунни МахIачкъалаллал шагьрулул мажлисрал председатель Хиби Аьлиев.
КIицI лавгсса къатлуву ялапар хъанахъисса активистка Наниш Мажидовал барчаллагь увкунни ва проект дузрайн дуккан дан гьуртту хьусса цинявннахь.
– Жул ччянивасса хиялъя оьрчIан ва хъуниминнан рахIатсса, чIюлусса хIаят даву. 40 шинал лажиндарай шикку ссайнчIав ка щуну дакъая. ДакIнихтуну барчаллагь учин ччай бур ва давриву дакIгу, гужгу бивхьуминнахь, хаснува хъунмасса кумаг бувсса участокрал хъунама Багьауттин МахIаммадовлухь ва Загир Загировлухь,- увкунни ванил. Мукунма тавакъю бунни къуллугъчитурахь чIаравсса оьрчIру ттуплий буккайсса авлахъгу бакьин барча ччива куну.
Ххаллилсса даврихлу шагьрулул властирдахь барчаллагь тIисса ихтилатру бунни мукунма штабрал члентал Ххадижат АхIмадовал ва Исмяил Гьаруновлул.
Мюрщи оьрчIан ва кьини тIуркIурдащалсса, бяст-ччаллащалсса ва аниматортуращалсса унгу-унгусса байран хьунни.
ДакIнийн бутан, ва къатлуву ялапар хъанахъисса инсантурал хъунмасса кумаг бувссар ва уттигу буллай буссар хасъсса аьралий операциялул гьурттучитуран. Цинявппа цачIун хьуну, вайннал гьан бувссар хасъсса аьралий операциялийн 900 тонналия ливчусса гуманитар кумаг. Ва аьралийтурачIан биян бан 52-ла лавгун бур штабрава. Гьарица кьини хIаятраву щашлай буссар къертту. Уттинин вайннал щарщун дур 1903 къери.
Шиккун аьркинмунил хъирив бучIай отпускалий бувкIсса аьралийталгу.
Андриана Аьбдуллаева
