Ноябрьданул 13-нний МахIачкъалалив, А.В. Вишневскийл цIанийсса Республикалул клинический азарханалий, хьунни профессор ХIажиев Хайруттин Апаннинал арснан 105 шин шаврин хас бувсса щалагу Аьрасатнал элмийсса ва практикалул «Актуальные вопросы внутренней медицины» тIисса цIанилусса конференция. Яни Дагъусттан Республикалул терапевтътурал школалул гьану бивзсса Хайруттин ХIажиевлул аьпалун гьарца шинал шайсса «Гаджиевские чтения» конференция.
Ванил сакиншиндаралсса бувну бия Дагъусттаннал паччахIлугърал медициналул университетрал, Дагъусттан Республикалул ЦIуллу-сагъшиву дуруччаврил министерствалущал, Аьрасатнал терапевтътурал медициналул обществалул Дагъусттаннал региондалул отделениялущал ва А.В. Вишневскийл цIанийсса Республикалул клиникалул азарханалущал цачIуну.
Конференциялий гьуртту хьунни республикалул ва щалвагу Аьрасатнал цIа дурксса хIакинтал, терапиялул, ревматологиялул, кардиологиялул ва гематологиялул хьхьичIунсса пишакартал.
Дагъусттаннал паччахIлугърал медициналул университетрал ректорнал цIания бавтIминнахь ча бувкру тIисса, конференциялул даву дайдихьлахьисса махъ лавхъунни ва вузрал элмулул даврил проректор Наида Моллаевал.
Гихуннай экрандалий ккаккан дунни Аьрасатнал ЦIуллу-сагъшиву дуруччаврил министерствалул «НМИЦ терапии и профилактической медицины» ФГБУ-рал директор, Аьрасатнал Федерациялул ЦIуллу-сагъшиву дуруччаврил министерствалул терапиялул ва аьмсса практикалул штатрай бакъасса хъунмур пишакар, профессор Оксана Драпкинал видеообращение.
Конференциялул лагрулий элмийсса докладру бунни Аьрасатнал цIа дурксса аьлимтурал. Вайннавух: В.И. Мазуровлул (ш. Санкт-Петербург), Д.А. Сычевлул (ш. Москав), С. Н. Маммаевлул, Н.Ч. Байгишевал, С.ХI. Загълиевлул, ХI.Э. ХIажиевлул (ш. МахIачкъала) ва м.ц.
Ахирданий махъ лавхъунни Аьрасатнал терапевтътурал медициналул обществалул Дагъусттаннал региондалул отделениялул председатель, РНМОТ-рал президиумрал член, Аьрасатнал ЦIуллу-сагъшиву дуруччаврил министерствалул штатрай акъасса хъунма пишакар-терапевт, СКФО-райсса гастроэнтеролог, профессор Сулайман Маммаевлул.
Бадрижамал Аьлиева
