Вай гьантрай Лакрал райондалийсса ДучIиннал шяраву кIира ххаллилсса мероприятие хьунни. Шикку тIиртIунни ДучIиннал шяравасса чичу, хIакин Зиябуттин-хIажи Айдамировлул цIа уттара дуллалисса ула. Вара кьини шяраву шадлугърал даражалий тIивтIунни цIуну бувсса мизит.
Мероприятиялий гьуртту хьун бувкIун бия Лакрал райондалул бакIчинал хъиривчу Абубакар Къюннуев, райондалул Культуралул управлениялул хъунама Ансар Къажлаев, Гъумуксса Хъун-мизитрал вакилтал, МахIачкъалалия, Каспийскалия, Новостройрая бувкIсса хъамал, Зиябуттин-хIажинал оьрчIру, оьрчIал оьрчIру, гъан-маччами. Шаэрнал къатрал чIирай ларчIсса ула тIитIин вихшала дунни хъунама арс Айдамирдуйн ва кулпат СултанпатIиматлуйн. Зиябуттин-хIажи дакIнин утлатисса махъру лавхъунни СултанпатIиматлул, шаэр Аьбдулмажид Исмяиловлул, КIулушацIрал шяраваллил администрациялул бакIчи МухIсин МахIаммадовлул, Новостройрайсса ДучIиннал школалул учитель МахIаммад Неъматуллаевичлул, гъанчу Мамедлул, шяравучу Султан Апанниевлул ва м.ц. Цала буттая кутIану бувсунни Айдамирдулгу.
ДакIнин бутан, Зиябуттин Айдамировлул дурссар Лакрал райондалийсса ДучIиннал шяравалу цIу дуккан даврин дайдихьу. Ва ивзссар кулпатращал, халкьуннал кьариртун, эяллайн дурксса, мечIан тартсса буттал шяравун 1998-ку шинал. Бувцуссар шяравун чани, бакьин буллай айивхьуссар шяравунсса ххуллу. Зиябуттиннун ччай бивкIун бур чIаххуврайсса НицIавкIуллал, Маркьиял шяраваллавунгу чани буцин, шяраву медициналул пункт ва чаклинсса къатта бан, ДучIиннал шяраваллил статус дан. Бусласимунийн бувну, ва жяматрай дакI-лякьа цIуцIисса ивкIун ур.
1944-ку шинал, ДучIиннал шяравалу Аухуллал райондалийн дизан дуллалисса чIумал, Зиябуттин 14 шин хьусса чIаважагьил ивкIун ур. Ванан ккарккун дур ххуллийхсса якьамашиву. Буслан икIайсса ивкIун ур, пенсиялийн уккайхту, буттал шяравун изансса нанижат дуршиву. Му, цала махъ бацIан бан, чани бакъасса,ххуллу бакъасса кIанттурдайн ивзун, къатта-къушгу бувну, шикку мина дирхьуну дур.
– Шяравалу цIу дуккан данну тIисса ниятрай бувкIссияв, планну чIярусса дуссия. Жу бивзун махъ шиккун цаймигу кулпатру бивзунни. Жун кумаг бан увкIсса куявгу шиккува ливчIунни. Ва цувагу строительли. Шяраву ванал ацIнияхъайсса къатри дунни, – буслай бур СултанпатIимат.
Зиябуттин-хIажинал кулпатрал, оьрчIал дакIнийхтунусса барчаллагь увкунни ва даву дузрайн дуккан дан кумаг бувсса, хIакьину ва мажлисрай гьуртту хьун, цала кьини хъун дан бувкIсса цинявннахь.
Мажлис къуртал хьуну махъ цинявппа бувкIунни Зиябуттин-хIажинал къатлуву тIивтIусса ссупралухун.
Вара кьини шяраву тIивтIунни цIуну бувсса мизит. Шяраву мизит баврил сиптачитал хьуну бур шиччавасса Юнус ва МахIаммад Апанниевхъул. Мизит ца шинал дянив бувну бур. Шяраву цIусса мизит бансса пикрилий ивкIун ур цила чIумал Зиябуттин-хIажи Айдамировгу.
Ва даврил дайдихьулий сакиншиннарал чIявусса масъалартту щаллу бан кумаг бувну бур Лакрал райондалул имам ХIабиб Батталовлул, мукунма Дагъусттаннал духовенствалул вакилтал Шихмурад ХIажимурадовлул ва МухIаммад Майрановлул.
Андриана Аьбдуллаева
