Октябрьданул 31-нний «Дагестан» РИА-лий хьунни «Лига первых» тIисса Студентътурал футболданул лигалул финалданун хас дурсса пресс-конференция. Муний гьуртту хьунни Любительтурал футболданул федерациялул президент Рамазан Гъазиев ва региондалул «Движение Первых» отделениялул председательнал хъиривчу Рашид Аьбдуллаев.

Рамазан Гъазиевлул тIимунийну, турнирданий гьуртту хьунтIий дур СКФО-рал арулла региондалиясса командартту, миннувух Къиримнал, Севастопольлал, Херсоннал, Запорожскаллал ва Луганскаллал Халкьуннал Республикарттал командарттугу. Проектрал цачIун увну ур билаятрал 64 дукка­врил учреждениялувасса 4200 гьурттучи.
– Ларгмур шинал жу дуварду СКФО-рал регионнал дянивсса футболданул турнир, муния махъ тавакъю буллали­сса чIявусса чагъарду букIлай бия проект лахъи лаган даврил хIакъираву. Яла жу гьарта дуварду география ва кIункIу буварду цIусса регионну, – увкунни Рамазан Гъазиевлул.
Сакиншинначитурал тIимунийну, проектрал бур кIива мурад: студентътурал чурхру цIуллу-цIакь баву ва ми социал чулуха таза буккан баву (развитие их социальной активности). ЦIанасса ппурттуву регионнайсса бяст-ччаллу къуртал хьуну бур. Финалданул тIуркIурду хьунтIий бур ноябрьданул 10-11-нний.
Рашид Аьбдуллаевлул бусаврийну, проект бартдигьлагьиссар Щалагу Аьрасатнал «Движение Первых» суккушиндарал грантирттал конкурсрал лагрулий. Ва суккушиндарал конкурсрал грант ларсъссар кIира шинай – дукIугу, гьашинугу. Турнирданул патриотшиврул программалул лагрулий 180 гьурттучинан сакин дурну дур автобусрай занази баву, тIутIив дишаву ва Боевой славалул музейравун буцаву. Дагъусттанная бяст- ччаллавух гьуртту хьунтIий дур Дарбантуллал колледжрал команда. Финалданул тIуркIурду хьунтIий бур «Имамат-Арена» стадиондалий.

ХI.Аьдилов