Вай гьантрай Ккуллал райондалул бакIчинал хъиривчу Анатолий Давдиев ва Лакрал ва Ккуллал районнал военком Аьли ГъазимахIаммадов хьунабавкьунни Ватандалул мурадру буруччаврил ххуллий къучагъшиврий жан дуллусса ХIамза АхIмадовлул нитти-буттащал.
Аьралий бурж биттур буллай ккаккан дурсса къучагъшиврухлу ХIамза АхIмадов аьпалул хьуну махъ лайкь хьуну ур Суворовлул медальданун. Виричунал канил дугьан нясив къархьусса медаль дуллунни ванал нитти-буттахьхьун. Барчаллагь увкунни Ватандалийн дакI тIайласса арс тарбия аврихлу. Бувсунни аьраличунал кулпатран бикIантIишиву гьарица чулухасса кумаг ва кабакьу.
– Барчаллагь тIий ура хIакьсса виричу тарбия аврихлу. Жунма къабучIиссар Ватандалул ххуллий чувшиврий жан дуллуми хъамабитлан, буржлувссару вирттаврал аьпа буручлан, – увкунни Аьли ГъазимахIаммадовлул.
Дагъусттаннал чиваркIуннаву мудангу ларайсса къучагъшиву диркIшиву исват буллай бур хасъсса аьралий операциялий гьуртту хъанахъисса жула жагьилтурал.
ХIакьинусса кьини вирттавран ккалли бан бучIир ХIамза ва ванахава лавхьхьусса кьянкьа-кьурчIисса хасиятру дусса жула оьрчIру. Барчаллагьри, оьрмурдан нигьачIаву дунугу, вас-ццах бакъа Ватандалул мурадру буручлачисса оьрчIан лайкьсса тарбия дуллусса цинявппагу нитти-буттан.
Имара Саидова
